स्नूकर सञ्चालकको हत्या आरोपमा एकजना पक्राउ

काठमाडौं । काठमाडौंको शंखमुलमा दुई दिनअघि भएको स्नूकर सन्चालकको हत्या आरोपमा एक जना पक्राउ परेका छन् । पक्राउ पर्नेमा बाराको सिम्रौनगढ घर भई काठमाडौं महानगरपालिका-१० बस्दै आएका २२ वर्षीय एमके कुमार रहेका छन् ।

टाइम पास स्नुकर सञ्चालक ४१ वर्षीय रुपक बान्तवा आफ्नै कार्यालयमा मध्यरात सख्त घाइते अवस्थामा भेटिएका थिए । उनको उपचारका क्रमममा सिभिल अस्पतालमा मृत्यु भएको थियो ।

हत्यापछि काठमाडौं प्रहरी परिसर, काठमाडौं उपत्यका अपराध अनुसन्धान कार्यालय र बानेश्वर वृत्तले अनुसन्धान थालेका थिए । काठमाडौं परिसरको टोलीले एमके कुमारलाई नियन्त्रणमा लिएको हो । प्रहरीले पूर्व रिसईबीका कारण एमके कुमारले बान्तवाको हत्या गरेको जनाएको छ ।

काठमाडौं प्रहरी परिसर प्रवक्ता नवराज अधिकारीले घटनामा प्रयोग भएको रड, मृतकको चेक, चस्मा, ब्याग र लुगा उनको साथबाट बरामद भएको जानकारी दिए ।