हात्ती, जेब्रा लगायत ७०० जंगली जनावर मारेर जनतालाई मासु खुवाउँदै नामिबिया सरकार

काठमाडौं । अफ्रिकी देश नामिबियाले ७०० वटा जंगली जनावर मार्ने भएको छ । त्यसरी मारिने जनावरहरुमा हात्ती, जेब्रा, हिप्पो लगायत भएको अमेरिकी विश्व च्यानल सीएनएनले बताएको छ ।

जसमा ३०० जेब्रा, ८३ हात्ती र ३० हिप्पो मारिने सूचीमा रहेका छन् । सीएनएनका अनुसार नामिबियन सरकारले खाद्य असुरक्षा भएका जनताहरुलाई ती जनावरको मासु बाँड्ने योजना बनाएको छ ।

देशमा १०० वर्ष यताकै सबैभन्दा खराब खडेरी आएपछि त्यसको सामना गर्न यस्तो योजना सार्वजनिक गरिएको हो । देशका झण्डै आधा अर्थात् १४ लाख जनसंख्याले खाद्य सुरक्षा संकट महँसुस गरेको नामिबियन सरकारले बताएको छ ।

अहिलेसम्म १५० जनावरहरु काटिसकिएको र त्यसबाट आएको १ लाख २५ हजार पाउण्ड मासु वितरण गरिएको नामिबियन सरकारले बताएको छ । नामिबिया पश्चिम अफ्रिकाको सामुद्रिक देश हो । आन्ध्र महासागरसँग यसको सीमा जोडिएको छ ।