टुँडिखेलमा हुलहुज्जत गरेको आरोपमा पक्राउ परेको तीनजना धरौटीमा छुटे

काठमाडौं । प्रधानमन्त्री केपी शर्मा ओली र कांग्रेस सभापति शेरबहादुर देउवा सहभागी रहेको कार्यक्रममा हुलहुज्जत गरेको आरोपमा पक्राउ परेका तीन जना धरौटीमा रिहा भएका छन् ।

प्रहरीले जाहेरी दर्ता गरेर अनुसन्धानका लागि दुई जनाको पाँच दिन र एकजनाको ९ दिन म्याद लिएकोमा उनीहरुलाई काठमाडाैं जिल्ला अदालतले शुक्रबार छाड्ने आदेश दिएको हो । उनीहरुलाई जनही ९ हजार रुपैयाँ धरौटी लिएर छाडिएको हो ।

गत सोमबार टुँडिखेलमा आयोजित गौरा पर्वको कार्यक्रममा ओली र देउवा अतिथि बनेर पुगेका थिए । नेताद्वयविरुद्ध नाराबाजी र होहल्ला भएको थियो । प्रहरीले दुईजनालाई सोहीदिन र थप एकजनालाई भोलिपल्ट पक्राउ गरेको हो ।

पक्राउ पर्नेमा सुर्खेत घर भइ वाफलमा रोयल खाजाघर सञ्चालन गर्ने ३४ वर्षिय गोपीराम जैसी, अछाम घर भइ हाल कोटेश्वर बस्ने २५ वर्षिय रेम्बो बुढा भनिने रामबहादुर बुढा र कञ्चनपुर घर भइ हाल किर्तिपुर बस्ने दिपक सिंह ठगुन्ना रहेका छन् । जैसी र बुढा अघिल्लो दिन र ठगुन्ना भोलिपल्ट पक्राउ परेका हुन् ।