रुसी राष्ट्रपति पुटिन मंगोलियामा, पक्राउ गर्न जेलेन्स्कीको आग्रह

काठमाडौं । रुसी राष्ट्रपति भ्लादिमिर पुटिन छिमेकी भूपरिवेष्टित देश मंगोलिया पुगेका छन् । सोमबार राती मंगोलिया ओर्लिनु भन्दाअगाडि पुटिनलाई पक्राउ गर्न युक्रेनी राष्ट्रपति भोलोदिमिर जेलेन्स्कीले आग्रह गरेका थिए ।

सन २०२३ मार्चमा अन्तर्राष्ट्रिय अपराध अदालतले गरेको फैसलाको सम्मान गरेर पक्राउ गर्न जेलेन्स्कीले आग्रह गरेका थिए ।

युक्रेनी बालबालिकाहरूलाई गैरकानुनीरुपमा रुसमा लगिएको आरोप पुटिनलाई थियो । सोही मुद्दामा अदालतले फैसला गरेको थियो । तर, रुस तथा पुटिनले भने बालबालिकाहरुलाई युद्धबाट जोगाउन लगिएको तथा रुसमा पनि उनीहरूलाई युक्रेनी भाषामै शिक्षादीक्षा दिइएको बताएका छन् ।

अन्तर्राष्ट्रिय अपराध अदालतको सदस्य देश भएकोले मंगोलियाले पुटिनलाई पक्राउ गर्नुपर्ने युक्रेनी आग्रह छ । सोमबार मंगोलिया पुगेका पुटिनलाई पक्राउ नगरेर स्वागत गरिएकोमा युक्रेन क्रुद भएको छ ।

युक्रेनी विदेश मन्त्रालयले मंगोलियाले त्यसको परिणाम भोग्ने चेतावनी दिएको छ । तर, कस्तो परिणाम भनेर खुलाएको छैन । पुटिन सन १९३९ मा रुसी तथा मंगोलियाले सेनाले पराजित गरेको जापानी सैनिकसँगको युद्धको वार्षिक उत्सव मनाउन पुगेका हुन् ।

उक्त युद्ध महिनौँ चलेको थियो र दुवै देशका हजारौँको मृत्यु भएको थियो तर जित रुस तथा मंगोलियाको पक्षको भएको थियो ।