१० अफ्रिकी देशको नोट तथा सिक्कामा चिनियाँ परियोजनाका तस्विर

काठमाडौं । यही हप्ता चीनमा चीन-अफ्रिका शिखर सम्मेलन आयोजना भयो । अफ्रिकाका ५० देशका सरकार तथा राष्ट्र प्रमुखहरु र सरकारी प्रतिनिधिहरु सहभागी भएको शिखर सम्मेलन सेप्टेम्बर ४ देखि ६ सम्म भयो । प्रमुख कार्यक्रम यही भए पनि अरु साइड इभेन्टहरु भइरहेका छन् ।

यसैबीचमा विभिन्न अफ्रिकी देशहरुका नोट तथा सिक्काहरुमा चिनियाँ परियोजनाका तस्बिरहरुले स्थान पाएको छ । शिखर सम्मेलन सुरु हुनु अगाडि चिनियाँ उपविदेशमन्त्री हुआ छुनयिङले एक नोट सार्वजनिक गरिन् ।

इजिप्टको एक सिक्कामा चीनले बनाएको नयाँ प्रशासनिक भवनको तस्बिर राखिएको छ । चिनियाँ उपविदेशमन्त्रीले यहीमात्रै तस्बिर सार्वजनिक गरिन्, तर यस्ता सिक्का तथा नोट बनाउने इजिप्ट पहिलो र अन्तिम देश होइन ।

अफ्रिकाका दश देशले यस्तै नोट तथा सिक्का सार्वजनिक गरेका छन् । सुडानले आफ्नो १०० पाउण्ड नोटमा चीनले बनाइदिएको ड्याम राखेको छ । अल्जेरियाले आफ्नो ५०० र १००० दिनारको नोटमा क्रमशः चीनले बनाइदिएको स्याटेलाइट र मस्जिदको तस्बिर राखेको छ ।

गुइना देशले २० हजार फ्राङ्कमा चीनले बनाएको जलविद्युतको तस्बिर राखेको छ ।

यस्तै मोरक्कोले २० दिरानको नोटमा चीनले बनाइदिएको पुलको तस्बिर सार्वजनिक गरेको छ । कङ्गोको ५०० फ्राङ्कमा चीनले बनाएको पुल तथा मलावीको दुई हजार नोटमा चीनले बनाइदिएको विश्वविद्यालयको तस्बिर राखिएको छ ।