आफ्नो देशकी बालिकालाई भारतीय सीमा बलले गोली हानेको भन्दै बङ्गलादेशको आपत्ति

काठमाडौं । भारतीय सीमा बलले हानेको गोली लागेर आफ्नो देशकी बालिकाको हत्या भएको बङ्गलादेशले आरोप लगाएको छ ।

बङ्गलादेशले १३ वर्षीया स्वर्ण दाश नामकी बालिकालाई सीमा पार गरेकोमा गोली हानिएको आरोप लगाएको छ । भारतीय मिडियाले भने गोली लागेको अवस्थामा बङ्गलादेशी हिन्दू बालिकाको शव सोमबार बिहान भेटिएको लेखेका छन् ।

बङ्गलादेशको विदेश मन्त्रालयले बालिका हत्याबारेमा भारतसँग विरोध दर्ज गरेको सार्वजनिक गरेको छ । शेख हसिना सरकार सडकबाट ढलेपछि भारत र बङ्गलादेशको तनाव बढेको छ ।

हसिनालाई शरण दिएर सुपुर्दगी नगरेको बङ्गलादेशी पक्षको आरोप छ भने भारतले हिन्दू अल्पसंख्यकको हिंसा भएको भन्दै आलोचना गरिरहेको छ । भारत र बङ्गलादेशको चार हजार किलोमिटर बढी सीमा छ । यो भनेको नेपालको भारत र चीन दुवै देशसँगको सीमाना भन्दा धेरै हो ।