गाउँपालिका अध्यक्षसहितका जनप्रतिनिधि सडक बनाउन माग गर्दै रिले अनशनमा

रुपन्देही । पश्चिम नवलपरासीको प्रतापपुर गाउँपालिकाका सबै जनप्रतिनिधि हुलाकी सडक निर्माण छिटो गर्न माग गर्दै रिले अनशन बसेका छन् ।

ठेकदार कम्पनी र सङ्घीय सरकारलाई दबाब दिन प्रतापपुर गाउँपालिका अध्यक्ष,उपाध्यक्ष सहितका जनप्रतिनिधिहरू आजदेखि रिले अनशनमा बसेका हुन् ।

उनीहरुलाई संघ तथा प्रदेशका निवर्तामान र वर्तमान सांसदहरुले पनि साथ दिएका छन् ।

रिले आनसन गाउँपालिका अध्यक्ष उमेशचन्द्र यादवको नेतृत्वमा संविधान सभा सदस्य विक्रम खनाल, लुम्बिनी प्रदेशसभा सदस्य विश्व प्रेम पाठक, गाउँपालिका उपाध्यक्ष मान कुमारी चौधरी, ९ वटै वडाका वडा अध्यक्षहरू र स्थानीय जनताहरू बसेका छन्।

नारायण चोकदेखि त्रिवेणीसम्मको करिब १५ किलोमिटर हुलाकी सडक ठेकदारले समयमा निर्माण कार्य सम्पन्न नगरेकाले स्थानीय यात्रीहरूले वर्षामा हिलो र घाममा धुलोको मार खेपी रहेका छन् ।

ठेकदारले ६ वर्षमा पनि हुलाकी सडक निर्माण गर्न नसकेको र निर्माण कार्यमा चरम ढिलाइले यो बाटो अलपत्र परेकाले दबाबका लागि आफूहरूले रिले अनसन थालेको अध्यक्ष उमेशचन्द्र यादवले बताए ।