सरकारी कार्यालयमा शेयर कारोबारमाथि कडा निगरानी, टीएमएस चलाएको चेक गर्न ‘आइटी स्पाइ’

काठमाडौ‌ं । अन्तत सरकारी कार्यालयमा शेयर कारोबार नहुने गरी टीएमएस बन्द गरिने भएको छ । अबदेखि देशभरिका सबै सरकारी कार्यालयमा सेयर कारोबार गर्न पाइने छैन ।

प्रधानमन्त्री तथा मन्त्रिपरिषद् कार्यालयले सबै मन्त्रालय, आयोग, सचिवालय, कार्यालयमा पत्र पठाउँदै टीएमएस नचल्ने व्यवस्था गर्न निर्देशन दिएको छ । सबै स्थानीय तहमा टीएमएस नचल्ने व्यवस्था गर्न संघीय मामिला तथा सामान्य प्रशासन मन्त्रालयलाई पनि निर्देशन दिइएको छ ।

सिंहदरबारभित्र शेयर कारोबार रोक्न भन्दै अख्तियार दुरुपयोग अनुसन्धान आयोगले आइतबार प्रधानमन्त्री तथा मन्त्रिपरिषदको कार्यालयलाई पत्र पठाएको थियो । सोही पत्रको आधारमा प्रधानमन्त्री कार्यालयले मंगलबार सबै सरकारी कार्यालयमा टिएमएस नचल्ने बनाउँन निर्देशन दिएको छ ।

सिंहदरबारका कर्मचारी कार्यालय समयमा काम छाडेर सेयर कारोबारमा व्यस्त हुने गरेको उजुरीपछि अख्तियारले अनुगमन गरेको थियो । अनुगमनमा पनि उजुरी गरेको जस्तै अवस्था देखिएपछि अख्तियारले पत्र काटेको थियो ।