सातवटै प्रदेशमा सकियाे माओवादी हाइकमान्डकाे दाैड- प्रचण्डकै नेतृत्वमा एकढिक्का हुने निचाेड

काठमाडौं । नेकपा माओवादी केन्द्र मधेश प्रदेशको परामर्श बैठक आज सकिएको छ। दुई दिनसम्म महोत्तरीको बर्दिबासमा चलेको बैठकलाई पार्टीका केन्द्रीय पदाधिकारीले सम्बोधन गरेपछि सकिएको हो।

बैठक समापनमा गर्दै अध्यक्ष पुष्पकमल दाहाल ‘प्रचण्ड’, बरिष्ठ उपाध्यक्ष नारायणकाजी श्रेष्ठ, उपाध्यक्षहरु अग्नि सापकोटा र पम्फा भुसाल, महासचिव देव गुरुङ, उपमहासचिवहरु गिरिराजमणि पोख्रेल, हरिबोल गजुरेल, जनार्दन शर्मा र शक्तिबहादुर बस्नेतले सम्बोधन गरेका थिए।
बैठकमा हिजो ४६ जना र आज थप दुई जना गरी ४८ जना सहभागीले बोले।

बैठकमा केन्द्रीय पदाधिकारीसहित प्रदेशमा कार्यरत केन्द्रीय सदस्य र प्रदेश पदाधिकारीहरुको सहभागिता रहेको थियो। पार्टी केन्द्रीय समितिको बैठकको तयारी स्वरुप माओवादी केन्द्रले विभिन्न प्रदेशमा परामर्श बैठक आयोजना गर्दै आएको छ।

माओवादी केन्द्रले मधेश प्रदेशसँगै भूगोलका सातवटै प्रदेशको बैठक सम्पन्न गरेको छ। यसअघि बागमती, उपत्यका विशेष प्रदेश, सम्पर्क समन्वय प्रदेश, गण्डकी, सुदूरपश्चिम, कर्णाली, लुम्बिनी प्रदेश, प्रदेश नम्बर १ तथा केन्द्रीय अनुशासन आयोग, निर्वाचन आयोग र लेखा आयोगको परामर्श बैठक सम्पन्न गरिसकेको छ।

अब सल्लाहकार समिति, ज्येष्ठ कम्युनिष्ट मञ्च र प्रवास प्रदेशको बैठक सकेर केन्द्रीय समिति बैठकको तयारीमा लाग्ने माओवादी केन्द्रले जनाएको छ। केन्द्रीय समिति बैठकपछि संगठन सुदृढीकरण र जनपरिचालनका कार्यक्रम तय गर्ने प्रवक्ता अग्निप्रसाद सापकोटाले बताए।
अहिले पार्टीभित्र देखिएका सबै समस्या समाधान गरेर अध्यक्ष प्रचण्डकै नेतृत्वमा एकताबद्ध भएर अगाडि बढ्नुपनेमा नेता कार्यकर्ताको जोड रहेको सुनाए।

यो परामर्श बैठकपछि प्रचण्डले केन्द्रीय कमिटीको बैठक राख्ने तयारी गरेको छ। परामर्श समितिको बैठकमा आएका सुझावलाई समेटेर पार्टीलाई नयाँ ढंगले अगाडि बढाउनेगरी दस्तावेज लेख्ने प्रचण्डले तयारी गरेको छ।

परामर्श समितिको बैठकअघि बसेको स्थायी कमिटीको बैठकमा उपमहासचिव जनार्दन शर्माले नेतृत्व हस्तान्तरणको सुझावसहित फरक दस्तावेज बैठकमा राखेका थिए। त्यसले माओवादी वृत्तमा ठूला तरंग ल्यायो। यद्यपी, प्रचण्डले शर्माको प्रस्तावको बिषयलाई पनि आफ्नो दस्तावेजमा समावेश गर्ने आश्वासनपछि अहिले माओवादीभित्रको विवाद अस्थायी बिराम लागेको छ।

परामर्श समितिको बैठकपछि सातै प्रदेशका वस्तुगत तथा आत्मगत परिस्थिति र नेता कार्यकर्ताको भावना बुझी आसन्न केन्द्रीय कमिटी बैठकबाट आगागी नीति तथा कार्यक्रम निर्माणमा गर्नुपर्ने केन्द्रीय सदस्य युवराज दुलालले बताए। अभियानको रुपमा अगाडि बढाएका बैठकहरुबाट प्रचण्डको नेतृत्वमा एकताबद्ध भएरै अगाडि बढ्ने सन्देश दिएको उनले बताए।