कोटिहोममा विजय कृष्णमुर्तिका खर्चः स्वयंसेवकलाई सवा चार करोड, मिडियालाई १ करोड ८ लाख

हेर्नुस् विजय कृष्णमुर्तिले देखाएका आम्दानी र खर्चको विवरण

नेपाल प्रेस

२०८१ भदौ २७ गते १५:४७

काठमाडौं । पशुपति मन्दिरमा आयोजित कोटिहोममा अथाह रकम दान संकलन भए पनि घाटा लागेको विवरण आयोजक विजय कृष्णमुर्तिले आज प्रस्तुत गरेका छन् । आफूलाई ७२ लाख ५० हजारभन्दा बढी ऋण लागेको उनको अपत्यारिलो दाबी छ ।

कृष्णमुर्तिले देखाएको विवरणअनुसार एक महिनासम्म चलेको धार्मिक उत्सवमा २० करोड १५ लाख रुपैयाँभन्दा बढी दान संकलन भएको थियो । तर, खर्च त्योभन्दा पन बढी २० करोड ८८ लाख भएको विवरण उनले सुनाए ।

झण्डै २१ करोड रुपैयाँ के–के मा भयो त खर्च ? कृष्णमुर्तिका अनुसार सबैभन्दा बढी खर्च स्वयंसेवकका लागि भएको छ । ‘स्वयंसेवक’ शब्दले कुनै भुक्तानी नलिइकन सेवाभावले गरिने कामलाई बुझाउँछ । तर, आफूले स्वयंसेवकलाई मात्रै ४ करोड २६ लाख ५३ हजार ५० रुपैयाँ भुक्तानी दिएको कृष्णमुर्ति बताए ।

एक महिनाको कोटिहोम लगाउँदा स्वयम्सेवकलाई झण्डै एक वर्षको भुक्तानी

यस विषयमा प्रकाश पार्दै उनले यस्तो भनेः

कुन व्यक्तिलाई कति पैसा दिइयो भन्ने चेकमार्फत भुक्तानी लिएको रेकर्डहरु छ । आजसम्म मैले काम गरेको थिएँ भनेर सडकमा लडाईं गर्ने, मिडियामा इन्टरभ्यू दिने साथीहरु हुनुहुन्छ । सकेसम्म बोलाएर हाजिर हेरेर पठाएको अवस्था छ । काम गर्दै नगरेका कोही, दुई दिन आएर एक महिना हराएका कोही, आएर प्रसाद मात्र खाएर गएका तर कामको सिन्को पनि नभाँचेकाले पनि दाबी गर्नुभएको छ । अझै पनि कसैलाई तिर्नु छ भने मजाले आउन सक्नुहून्छ । कसैको एक रुपैयाँ खानु छैन । मैले त १७ वर्षदेखि गर्दै आएको कुरा हो । जति राम्रो गरे पनि मलाई अहिलेसम्म कसैले भनेका छैन । अलिअलि केही हजुरहरु (पत्रकार) मध्ये, मलाई लाग्छ यहाँ ७५ प्रतिशत हुनुहुन्छ होला मलाई राम्रो भन्ने । अहिले आएर त्यस्तो महसुस भयो । नत्र जति राम्रो गरे पनि बंगाएकै हुनुहुन्छ । नेपालमा त्यस्तै छ हेरिस्यो ।’

कोटिहोमका लागि गत वर्ष मंसिरदेखि नै स्वयम्सेवक हायर गरेको कृष्णमुर्तिले बताए । अहिले भदौसम्म आउँदा १० महिना आफूले स्वयम्सेवक पालेको उनको भनाइ छ ।

‘कतिलाई साउनसम्मको एग्रिमेन्ट गरेका थियौं, खाजा–खाना र बासस्थान समेत दिएका थियौं’, उनले भने, ‘कतिपयले हामीलाई भदौसम्म नै सहयोग गर्नुभएको छ ।’

कृष्णमुर्तिका अनुसार कोटिहोको प्रचारका लागि गरिएका विभिन्न र्याली (ट्याक्सी, रिक्सा, मोटरसाइकल र साइकल र्याली) मा १९ लाखभन्दा बढी खर्च भयो । ४२७ वटा ट्याक्सीलाई दुई हजारको दरले, १४२ वटा रिक्सालाई ३ हजारको दरले, ५३६ वटा मोटरसाइकललाई एक हजारका दरले र साइकललार्ई ५–५ सय रुपैयाँ दिइएको थियो । उनीहरुलाई पानी आफ्नै व्यक्तिगत खर्चमा उपलब्ध गराएको कृष्णमुर्तिले बताए ।

कृष्णमुर्तिले कोटिहोममा आएका धार्मिक गुरु र कथावाचकहरुलाई कति दक्षिणा दिए भन्ने व्यापक चासो थियो । आजको पत्रकार सम्मेलनमा उनले पण्डित तथा कथावाचकहरुलाई झण्डै दुई करोड रुपैयाँ दक्षिणा दिइएको बताए ।

कृष्णमुर्तिका अनुसार कोटिहोममा १३५ जना धार्मिक गुरुहरु उपस्थित भएका थिए । उनीहरु सबैलाई दान–दक्षिणासहित बिदाइ गरिएको उनले बताए । भागवत पाठ, रुद्री हवनमा खटिएका गुरुहरुको दक्षिणामा ६५ लाख १४ हजार रुपैयाँ खर्च भएको थियो । आचार्य र विशिष्ट गुरुहरुलाई २७ लाख १३ हजार दिइएको उनले बताए ।

कृष्णमुर्तिको विवरणअनुसार प्रमुख कथावाचकहरुले एकमुष्टरुपमा ७७ लाख रुपैयाँभन्दा बढी दक्षिणा लगेका छन् । प्रमुख कथावाचकमा देवी प्रतिभा, चन्द्रकला सखी, राधिका दासी, दिनवन्धु पोखरेल, कान्ता भट्टराईलगायत छन् ।

देवी प्रतिभालार्ई भारतबाट र चन्द्रकला सखीलाई लण्डनबाट झिकाएको थियो । सबैलाई कोटिहोमस्थलमा ल्याउन हवाइ भाडा र बासस्थानको खर्चको हिसाब छुट्टै छ । गुरु र अतिथिहरुलाई फलफुल र मिठाइ खुवाउन २२ लाख ९२ हजार १२० रुपैयाँ खर्च भएकोसमेत कृष्णमुर्तिले बताए ।

कृष्णमुर्तिले देखाएको अर्को महत्वपूर्ण खर्च भनेको मिडियासम्बन्धी छ । महोत्सव प्रचारका लागि फेसबुक बुस्टसहित विभिन्न मिडियालाई आफूले १ करोड ८ लाख रुपैयाँ बाँडेको उनले स्वीकारोक्ति गरे । मिडियालाई कुन शीर्षकमा पैसा दिएको हो भन्ने उनले खुलाएनन् ।

मोटामोटी खर्चहरुको सूचीः

पशुपति विकास कोष र अन्यलाई भाडाः ५८ लाख १३ हजार

खाद्यान्नः ९३ लाख ९५ हजार

टेन्टः ९७ लाख ५० हजार

साउन्ड सिस्टमः २१ लाख

स्टेसनरी सामानः ७ लाख ४८ हजार

अतिथि र दातालाई सम्मानका सामग्रीः १ करोड ९२ लाख ५७ हजार

गुरु तथा अन्य आगन्तुकलाई बासस्थानः १ करोड २६ लाख ५७५

पकाउने भाँडाः ४ लाख

ग्याँसः ९ लाख ४७ हजार

सवारी साधनको इन्धनः ३१ लाख ७३ हजार

पब्लिसिटीः ८२ लाख