रास्वपालाई सिटौलाको सुझाव- तपाईंहरू आएकोमा कुनै गुनासो छैन, उत्ताउलो नबन्नुस्

काठमाडौं । नेपाली कांग्रेसका नेता कृष्णप्रसाद सिटौलाले देशलाई बाटो देखाउने कांग्रेसबाहेक अरुले नसक्ने दाबी गरेका छन्।

१११ औं विपी जयन्तीको अवसरमा आयोजित अन्तरक्रिया कार्यक्रमलाई सम्बोधन गर्दै कांग्रेसले चुनाव हारेपनि जितेपनि देश बनाउने पार्टी कांग्रेस नै भएको जिकिर गरे।

उनले रास्वपा, जनमतसहित जन्मिएका नयाँ पार्टीहरुले जनताको पक्षमा काम गरेर देखाए कांग्रेसलाई गाह्रो नपर्ने सुनाए।

उनले भने, ‘तपाईंहरु जनताको लागि आउनुभएको भए कांग्रेसलाई किन गाह्रो हुन्छ। कांग्रेसको छातामा बस्नुस्, कांग्रेसको विचारमा आउनुस्। तपाईंहरु आएकोमा हाम्रो गुनासो छैन। तर, उत्ताउलो भएर नबोल्नुस्। अर्कालाई गाली गरेर आफ्नो कद आफैं नघाउनुस्।’

ठूला दलहरुले संघर्ष गरेर अहिलेको व्यवस्था बसेर उनैलाई गाली गर्न नमिल्ने बताए। उनले जनतालाई भ्रमित पारेर सिद्धान्त नछाड्न आग्रह गरे।