माओवादी सांसदको दाबी- धनराज गुरुङको सहकारी ठगीमा संलग्नता देखिन्छ, डिभोर्स पनि शंकास्पद छ (भिडिओ)

काठमाडौं । नेकपा माओवादी केन्द्रका सांसद लेखनाथ दाहालले छानबिन समितिको प्रारम्भिक अनुसन्धनमा कांग्रेस उपसभापति धनराज गुरुङ सहकारी ठगीमा संलग्न भएको देखाएको दाबी गरेका छन् ।

प्रतिनिधिसभाको बैठकपछि सञ्चारकर्मीहरुसँग कुरा गर्दै उनले सम्बन्ध विच्छेद पनि नक्कली जस्तो देखिएको बताए ।

उनले भने, ‘उहाँको विषयमा समितिले प्रारम्भिक अनुसन्धान गर्‍यो । थप अनुसन्धानका लागि सम्बन्धित निकायलाई सिफारिस गरेका छौं । प्रारम्भिक अनुसन्धानबाट रकम अपचलनमा उहाँको संलग्नता देखिन्छ । उहाँको सम्बन्ध विच्छेद पनि नक्कली देखिन्छ । कानूनसम्मत छ, तर नक्कली जस्तो देखिएको छ अनुसन्धानमा । २०७६ मा डिभोर्स गर्नुभएको २०७७ मा मेडमलाई साक्षी राखेर ऋण लिनुभएको छ । केही समयअघि मात्रै ७४ लाख किस्ता तिरेको देखिन्छ । उहाँको संलग्नता देखिन्छ, तर तार्किक निष्कर्षमा पुग्न अनुसन्धान प्रक्रिया बाँकी छ ।’

सांसद दाहालले थप अनुसन्धानको लागि सरकारलाई सिफारिस गरेको बताए ।