संविधान दिवसमा खुल्ने भयो आधुनिक धरहरा

काठमाडौं । संविधान दिवसको दिन आधुनिक धरहरा सर्वसाधारणको लागि खुला हुने भएको छ । शहरी विकास मन्त्रालयले बिहीबारदेखि औपचारिक रुपमा सर्वसाधारणको लागि आधुनिक धरहरा खुला हुने जनाएको हो ।

मन्त्रालयको शहरी विकास तथा भवन विभागअन्तर्गतको केन्द्रीय आयोजना कार्यान्वयन इकाइका अनुसार धरहरा चढ्न सर्वसाधारणले तत्काल शुल्क तिर्नुपर्ने छैन ।

सरकारले गठन आदेश नबनाउञ्जेलसम्म सर्वसाधारणलाई निःशुल्क गरिएको इकाइले जनाएको छ । इकाइले निःशुल्क प्रवेश गर्ने अनलाइन टिकटको लागि वेबसाइट बनाइरहेको छ । dharhara.gov.np मार्फत धरहरा चढ्ने अनलाइन टिकट बुक गर्न सकिनेछ ।

वेबसाइटबाटै इन्ट्री गर्न मिल्ने, बुक गर्न मिल्ने, क्यूआर कोड लिन मिल्ने व्यवस्था हुँदै गरेको इकाइले जनाएको छ । सोहीअनुसार टिकट स्क्यान गरेर निःशुल्क आधुनिक धरहरा चढ्न पाइनेछ ।

एक दिनमा अधिकतम ५०० जना सर्वसाधारणले निःशुल्क धहरार चढ्न पाउने इकाइका आयोजना निर्देशक कोशनाथ अधिकारीले जानकारी दिए । उनका अनुसार त्यसबाहेक थप १०० जना वृद्ध, अशक्त, अपाङ्गता भएका व्यक्तिहरु चढन् पाउनेछन् ।

उनी भन्छन्, ‘भोलिदेखि कार्यालयकै अधिकृत बसेको हुन्छ । उहाँले त्यो कुरा हेरेर त्यो वर्गका १०० जनालाई टिकट दिनुहुन्छ । बाँकीले वेबसाइटबाट आफ्नो डिटेल इन्ट्री गराएर आउने क्यूआरको भरमा चढ्न पाउनुहुन्छ ।’

निर्देशक अधिकारीका अनुसार वेबसाइट भने बुधबार बेलुकासम्म तयार हुनेछ । उनले भने, ‘हामी हतारमा छौं । आजै वेबसाइट सञ्चालनमा ल्याउने प्रयास गर्दैछौं । सम्भवतः बेलुकासम्म सकिएला ।’

भदौ २७ गते बसेको मन्त्रिपरिषद् बैठकले असोज ३ गते संविधान दिवसको दिनदेखि धरहरा सञ्चालन गर्ने निर्णय गरेको थियो । सोहीअनुसार शहरी विकास तथा भवन विभागअन्तर्गतको केन्द्रीय आयोजना कार्यान्वयन इकाइले धरहरा खुला गर्ने तयारी गरेको थियो । नवनिर्मित आधुनिक धरहराको कन्स्ट्रक्सनको काम अझै सकिएको छैन । भोलिदेखि मुख्य संरचनाहरुमात्र सञ्चालनमा ल्याइने इकाइका आयोजना निर्देशक अधिकारीले बताए ।

ठेकेदार कम्पनीले बाँकी काम अझै गरिरहेको छ । त्यो काम सकाएर हस्तान्तरण गरेपछि मात्र कसलाई सञ्चालन गर्न दिने भन्ने टुंगो लाग्ने उनी बताउँछन् । अहिलेलाई निःशुल्क गरिए पनि पछि कसरी सञ्चालन गर्ने भन्नेबारेमा केही निर्णय भइनसकेको उनको भनाइ छ ।

‘कसलाई कसरी सञ्चालन गर्न दिने भन्ने टुंगो लागिसकेको छैन’, अधिकारी भन्छन्, ‘अहिलेलाई निःशुल्क नै हो । यसको गठन आदेशदेखि सबै कुरा बन्न प¥यो । भोलि कुन निकायले सञ्चालन गर्ने टुंगो लागेको छैन । अहिले कन्स्ट्रक्सनको समय पनि अलिकति बाँकी छ । ठेकेदार कम्पनीले काम पनि गरिराखेको छ । त्यो काम सकिएर कसलाई दिने भनेर नेपाल सरकारले गठन आदेश बनाउँछ । गठन आदेश बनाइसकेपछि अनि बल्ल कुन निकायले सञ्चालन गर्ने हो । गठन आदेशमा के उल्लेख भएको हुन्छ, त्योअनुसार गर्ने हो ।’

प्रधानमन्त्री केपी शर्मा ओलीले ३ वर्षअघि नै निर्माणाधीन अवस्थामै धरहराको उद्घाटन गरेकाले पुनः धरहरा उद्घाटन गर्ने कार्यक्रम नरहेको विभागले जनाएको छ ।

यसअघि ओलीले तेस्रो कार्यकालमा निर्माणाधीन आधुनिक धरहराको उद्घाटन गरेका थिए, तर उद्घाटन भए पनि धरहरा अझै सर्वसाधारणको लागि खुला गरिएको थिएन । सर्वसाधारणले धरहरा उद्घाटन भएको तीन वर्षपछि औपचारिक रुपमा चढ्न पाउन भएका छन् ।

प्रधानमन्त्री ओलीले आफ्नो सय दिने कार्यकालभित्र धरहरा सञ्चालनमा ल्याउन निर्देशन दिएका थिए । ओलीले निर्देशन दिएपछि ठेकेदार कम्पनी र विभागलाई काम सकाउन दबाब परेको थियो । तोकिएको समयमा सबै संरचना सञ्चालनमा ल्याउन नसक्ने भएपछि ठेकेदार कम्पनीले हतारहण्तार मुख्यमुख्य संरचना तयार गरिदिएको हो ।

२०७२ सालको विनाशकारी भूकम्पले क्षति पुगेको ऐतिहासिक धरहराको ठुटो त्यत्तिकै राखेर निर्माण गरिएको आधुनिक धरहराको काम अन्तिम चरणमा पुगेको छ । यसअघि सातौं पटक म्याद थप गरेको निर्माण कम्पनीले गत असारमै काम सम्पन्न गरी हस्तान्तरण गर्ने भनेको थियो ।

भूकम्पले क्षति पुर्‍याएको तीन वर्षपछि २०७५ पुस १२ मा आधुनिक धरहरा निर्माणको शिलान्यास भएको थियो ।

आधुनिक धरहरा पुरानोभन्दा फराकिलो छ । बाहिरबाट हेर्दा ११ तलाको देखिने यसको भित्री संरचना २२ तलाको छ । माथि पुग्न दुई वटा लिफ्टको साथै सिँढीको पनि व्यवस्था गरिएको छ । ४२ रोपनी क्षेत्रफलमा फैलिएको धरहरा परिसरमा बगैंचा, संग्रहालय, प्रदर्शनी कक्ष, पुस्तकालय, पार्किङ स्थल, क्याफे र व्यापारिक पसल सञ्चालनमा आउनेछ । धरहरा परियोजनाअन्तर्गत यात्रु प्रतीक्षालय तीन महिनाअघि नै सञ्चालनमा आइसकेको छ ।

यस्तै धरहराभित्रको बेसमेन्टको पार्किङ पनि काठमाडौं महानगरपालिकाले सञ्चालनमा ल्याइसकेको छ । यहाँ ३५० वटा गाडी र ६ हजार मोटरसाइकल पार्किङ गर्न मिल्ने बताइएको छ ।

याे पनि पढ्नुहाेस् ।

ठेकेदार कम्पनी बालेनसँग आक्रोशित : महतो भन्छन्- धरहरा महानगरको होइन, मेयरले स्टन्ट गर्नुभयो

सुन्धारामा चिटिक्कका बस स्ट्यान्ड: बालेनको वाहवाही, तर बनाएको कसले ?

कार्यकालको सयौं दिनमा धरहरा खाेल्न प्रधानमन्त्री आतुर, सुन्धारालाई फाल्टै ठेक्का लगाउने विभागको सुर