शेयर कारोबारबाट दुई महिनामै गत वर्षभरीको भन्दा बढी राजश्व उठ्याे : अर्थमन्त्री पौडेल (भिडिओ)

काठमाडौं । उपप्रधानमन्त्री एवं अर्थमन्त्री विष्णुप्रसाद पौडेलले चालू आर्थिक वर्षको दुई महिनामै गत वर्षको वर्षदिनको भन्दा बढी राजश्व शेयर कारोबारबाट संकलन गरेको दाबी गरेका छन् ।

बुधवार नेप्से कार्यालयमा पुग्नुभएका अर्थमन्त्री पौडेलले गत आर्थिक वर्षभर शेयर कारोबारबाट ५ अर्बको हाराहारीमा राजश्व संकलन भएको तर यस वर्षको दुई महिनामै करिव पौने सात अर्ब बराबरको राजश्व संकलन गर्न सरकार सफल भएको दाबी गरेका हुन् । उनले चालू आर्थिक वर्ष ०८१/८२ मा शेयरबजारबाट साउनमा ४ अर्ब २३ करोड र भदौ महिनामा दुई अर्ब ५७ करोड राजश्व संकलन भएको बताए ।

उनले ३ हजार ४० मा पुगेको नेप्से एकाएक २५ सयमा कसरी झर्यो भन्दै प्रश्न गरे । उनले आफूले सो कुराको सही जवाफ नपाएसम्म स्वयं र कर्मचारीहरुलाई सोधिरहने बताए ।

उनले नेपालको पूँजी बजार र पुँजी बजारको सम्भावना, यसले भोगिरहेका समस्या, समाधानका उपायका विषयमा संस्थागत संरचनाहरु भित्र पनि, सम्बन्धित संस्थाहरुभित्र पनि र सार्वजनिक रुपमा पनि काफी छलफल, बहस हुने गरेको बताए । राजनीतिक रुपले अहिले पूँजी बजार नघटेको भन्दै पुँजी बजार बढाउन आवश्यक कदमहरु चाल्न सरकार तयार रहेको बताए ।

‘पोल्टिकल सिनारियाले पनि बजार प्रभावित हुन्छ भन्नुभयो । हप्ता, दश दिनका घटनाहरु हेर्दा त त्यस्तो कुनै राजनीतिक घटनाक्रम भएको छैन । नयाँ पोल्टिकल इभेण्ट्स देखिएको छैन । तर पुँजी बजारको प्रवृत्तिमा भने केही प्रश्न छ । हाम्रो पुँजी बजार दैनिक ३० अर्बको हाराहारीमा कारोबारमा पुगेको थियो । आज आइपुग्दा पाँच,६ अर्बको अवस्थामा छ । मेरो मनमा प्रश्न उब्जियो, यो किन भयो ? किन ३० अर्बको हाराहारीमा पुग्यो, किन ५/६ अर्बको अवस्थामा झर्यो । अघिल्लो वर्ष हामी वर्षभरमा हाम्रो राजश्व ५ अर्बको हाराहारी संकलन भएको थियो’, उनले भने, ‘अहिले एक महिनामै ४ अर्ब २३ करोड, भदौमै पनि दुई अर्ब ५७ करोड गरिकन हामीले करिव करिव लगभग पौने सात अर्ब जति राजश्व संकलन गरेका छौँ । नेप्से ३ हजार ४० मा पुगेको थियो, अहिले २५८० सयको आसपासमा छ । किन हाम्रो मार्केट यस्तो भयो ? यो मेरो मनमा उपस्थित प्रश्न हो । म आज यि प्रश्नहरुको जवाफ खोज्न आएको हुँ । जवाफ नभेटेसम्म मेरो जवाफ खोज्ने अभियान जारी रहन्छ । यि प्रश्नहरुको जवाफ चाहिएको छ । यो प्रश्नको जवाफ मसँगै खोज्छु, सचिवज्यु, जिम्मेवारी लिएका सबैसँग खोजिरहेको छु ।’

उपप्रधानमन्त्री पौडेलले प्रविधिबारे अपडेट हुन टाइम बाउण्ड क्यालेण्डर बनाइ काम गर्न पनि सम्बन्धित सरोकारवाला निकायहरुलाई निर्देशन दिए । उनले जनशक्ति व्यवस्थापनको योजना बनाउन, गुणस्तरीय सेवा प्रवाहमा जोड दिन पनि निर्देशन दिए ।

नेप्सेले लगानीकर्ताको विश्वास जित्ने, लगानीकर्ताको लगानी सुरक्षित गर्ने र स्वस्थ प्रतिष्पर्धालाई प्रवर्द्धन गर्न जोड दिए । पूँजी बजारका समस्या पहिचान गरी शिघ्र समाधानमा लाग्नुपर्ने बताए । सरकारले पूँजी बजारको दिगो, भरपर्दो विकासका पक्षमा काम गरिरहेको बताए ।