यी ३ जनाले पाउँदैछन् भैरव अर्याल स्मृतिका ३ पुरस्कार

काठमाडौं । नेपाली साहित्यका विराट प्रतिभा भैरव अर्यालको स्मृतिमा स्थापित विभिन्न तीन पुरस्कार प्राप्तकर्ताको नाम सार्वजनिक गरिएको छ ।

भैरव पुरस्कार गुठीद्वारा सार्वजनिक गरिएको नामअनुसार २०८१ सालको भैरव पुरस्कार हास्यव्यङ्ग्यकार लक्ष्मण गाम्नागेलाई प्रदान गरिने भएको छ । यो पुरस्कारको राशी १ लाख ११ हजार १ सय ११ रूपैयाँ रहेको छ ।

१ लाख १ हजार १ सय ११ रूपैयाँ राशीको भैरव वाङ्मय पुरस्कार चुडामणि गौतमलाई प्रदान गरिने गुठीले जनाएको छ । त्यस्तै ५१ हजार १ सय ११ रुपैया राशीको भैरव प्रतिभा पुरस्कार कलाकार लक्ष्मी गिरीलाई प्रदान गरिने भएको छ ।

पुरस्कार प्राप्तकर्ताहरूको नाम छनौट गर्न गुठीले साहित्यकार गोपाल बरालको संयोजकत्वमा साहित्यकारद्वय नरनाथ लुइँटेल र हरिकला उप्रेती सम्मिलित समिति बनाएको थियो । भैरव स्मृति दिवसको दिन यही असोज १९ गते शनिबार गोकर्णेश्वर-५ स्थित भैरव स्मृति भवनमा पुरस्कार वितरण गरिने गुठीका सचिव वसन्त रिजालले जानकारी दिए ।