अधिकांश समस्याग्रस्त सहकारीमा बाहिर ताला, भित्र यस्तो चाला

काठमाडौं । सहकारी छानबिन संसदीय विशेष समितिको स्थलगत अनुगमनको क्रममा केही सहकारी बाहिर बन्द गरेर भित्र काम गरिरहेको पाइएको छ ।

समितिले तयार पारेको प्रतिवेदनअनुसार सुरूमा कालिमाटीस्थित स्वर्णलक्ष्मी बचत तथा ऋण सहकारी संस्था लिमिटेडमा पुग्दा केही समयदेखि बन्द गरिएको संस्थाको आफ्नै जग्गामा भव्य/ठूलो भवन पाइएको छ । भने, सुमेरु बचत तथा ऋण सहकारी संस्था लिमिटेडमा पनि स्थलगत अनुगमनमा पुगेको थियो । सो सहकारीमा भने बाहिर ताला लगाएपनि भित्र भने खुला नै रहेको र कर्मचारी आई काम गर्ने गरेको स्थानीय बासिन्दाले जानकारी गराएका थिए ।

सिभिल बचत तथा ऋण सहकारी संस्था लिमिटेडको कार्यालयमा पुग्दा सिभिल ग्रुप नाम लेखिएको मूल्यवान जमिनमा विशाल कम्प्लेक्स भवन रहेको समितिले देखेको छ । अर्को समस्याग्रस्त गौतमश्री बचत तथा ऋण सहकारी संस्था लिमिटेडमा ताला खोली भित्र हेर्दा करोडौं मूल्यका हाइड्रोपावरका सामानहरू भवनभित्र यत्रतत्र छरिएका र बिग्रिने अवस्थामा रहेको पाइएको छ ।

मितेरी बचत तथा ऋण सहकारी संस्था लिमिटेडको अनुगमनका क्रममा उक्त सहकारी संस्थाका अध्यक्ष कुम्मराज गुरुङ्गसँग टोलीले छलफल गरेको थियो । भूतपूर्व गोरखा सैनिकहरूबाट सञ्चालित उक्त संस्थामा प्रबन्धक ज्योति गुरुङ्गले सहकारीको करोडौँ बचत रकम दुरुपयोग गरी संस्थालाई समस्यामा पारेको जानकारी दिए । संस्था भने अहिले पनि नियमित रूपमा सञ्चालनमा रहेको छ ।

सुमेरु बचत तथा ऋण सहकारी संस्था लिमिटेडमा अनुगमन टोली पुग्दा कर्मचारीहरू कार्यालयभित्रै रहेको र संस्था सञ्चालनमा रहेको पाइएको छ । संस्थाका अध्यक्ष नियमित कार्यालयमा उपस्थित भई बचतकर्ताको अलि अलि बचत फिर्ता गर्दैआएको बताएका छन् ।

अर्को समस्याग्रस्त लालिगुराँस बहुउद्देश्यीय सहकारी संस्था लिमिटेडको बन्द रहेको कार्यालयमा ताला खोलेर हेर्दा अध्यारो, धुलाम्मे र खाली कोठाहरु मात्रै भेटेको थियो । गुण को–अपरेटिभ लिमिटेड हाल राम्रोसँग सञ्चालन भइरहेको जानकारी सहकारी संस्थाका कर्मचारीहरूबाट समितिले पाएको छ ।

गोरखा बचत तथा ऋण सहकारी संस्था लिमिटेडमा लगाइएको ताला खोली हेर्दा सहकारीका कम्प्युटर लगायतका मेशिनरी र कागजातहरू पूर्णरूपमा यत्रतत्र छरिएको र कार्यालयको लेआउट कुनै बैभन्दा कम नरहेको समितिले पाएको छ ।

शिवशिखर बहुउद्देश्यीय सहकारी संस्था लिमिटेडको समेत स्थलगत अनुगमन टोलिले गरेको थियो । उक्त संस्थाका अध्यक्ष हाल कारागारमा रहेका र संस्था पूर्णरूपमा बन्द रहेको छ ।

नागरिक बचत तथा ऋण सहकारी संस्था लिमिटेडको स्थलगत अनुगमन क्रममा संस्थाका अध्यक्ष नुनम सुब्बा हाल कारागारमा रहेका र उनकी श्रीमतीसँग संस्थाबारे सोधपुछ गर्दा १२ बजेदेखि ३ बजेसम्म कारोबारसहित संस्था सञ्चालन हुदै आएको बताइन् । उक्त संस्था नेफ्स्कुनले लिलामी गरी लिएको जानकारी पाइएको छ ।

कान्तिपुर सेभिङ्ग एण्ड क्रेडिट कोअपरेटिभ लिमिटेडकाको कार्यालयमा २ वटा ताला लगाएर बन्द गरिएको छ । अध्यक्ष सीवी लामा हाल कारागारमा रहेका छन् । नेपाल वित्तीय सहकारी संस्था लिमिटेड हाल बन्द रहको छ । भने, संस्था रहेको घरका केही कोठाहरू भाडामा लगाइएको प्रतिवेदनमा उल्लेख छ ।