आमिर खानको छोरा थिइनँ भने ‘महाराज’मा अभिनय गर्न पाउँदिनँ थिएँ: जुनैद खान

काठमाडौं । बलिउड अभिनेता आमिर खानको छोरा जुनैद खानले फिल्म ‘महाराज’मार्फत् बलिउडमा डेब्यु गरे । नेटफ्लिक्समा रिलिज भएको यस फिल्मबाट जुनैदले तारिफ पनि बटुले ।

अहिले आएर भने ‘महाराज’ फिल्म पिता आमिर खानको कारण आफूलाई मिलेको खुलासा गरेका छन् । यदि आमिरको छोरा नभएको भए यस फिल्ममा काम गर्ने अवसर आफूले सायदै पाउने उनले बताएका छन् ।

भारतीय टिभी च्यानल एनडीटिभीसँगको अन्तवार्ताका क्रममा उनले भनेका छन्, ‘म यो कुरा स्वीकार गर्छु कि यदि म आमिर खानको छोरा थिइनँ भने सायद मैले ‘महाराज’मा अभिनय गर्न पाउँदिनँ थिएँ ।’

जुनैदको अन्तर्वार्ता सार्वजनिक भएपछि सामाजिक संजालमा उनको प्रशंसा भइरहेको छ । अन्तर्वार्ताका क्रममा उनले केही फिल्महरुमा अडिसन दिए पनि फाइनलसम्म पुग्न नसकेको बताएका छन् ।

उनले ‘लालसिंह चड्डा’का लागि पनि अडिसन दिएका थिए । आमिर खानले जुनैदको तारिफ पनि गरेका थिए । तर, ठूलो बजेटको फिल्म भएकाले नयाँ अनुहारसँग काम गर्ने जोखिम निर्माताहरुले लिएनन् ।