बजारु विश्लेषकहरुको पछि लागेर लगानी नगर्नुस्: नेप्से

काठमाडौ । सेयर बजारले खासै उचाइ लिन नसकेपछि नेपाल स्टक एकसचेन्ज (नेप्से)ले जथाभावी विश्लेषकको पछि लागेर लगानीको निर्णय नगर्न आग्रह गरेको छ ।

नेप्सेले सोमबार सूचना जारी गर्दै हालसम्म कुनै पनि व्यक्तिलाई विश्लेषकको रुपमा दर्ता वा मान्यता प्रदान नगरेको स्पष्टीकरण दिएको छ ।

सूचनामा भनिएको छ, ‘फेसबुक, ट्विटर, क्लब हाउस जस्ता सामाजिक सञ्जाल वा आमसञ्चारमाध्यममा त्यस्तो विश्लेषकको नाममा आउने विश्लेषणलाई आधार बनाएर लगानी गर्नु जोखिम हुन्छ ।’

यसकारण सबैले बुझेरमात्र लगानी गर्दा जोखिमबाट बच्न सकिने नेप्सेले जनाएको छ । सेयर बजारमा केही समययता कारोबार रकम ५ अर्बको हाराहारीमा रहेको छ ।

विभिन्न विश्लेषकहरुले सेयर बजार निकै घटेकाले नयाँ लगानीकर्ताले सेयर खरिद गर्ने उचित समय भएको बताउँदै आएका छन् ।