पौराणिक एक्सन थ्रिलर चलचित्र ‘डीएनए’को अनाउन्समेन्ट टिजर सार्वजनिक

काठमाडौं। हालै घोषणा गरिएको नेपाली पौराणिक एक्सन थ्रिलर चलचित्र ‘डीएनए’को टिजर सार्वजनिक गरिएको छ । टिजरमा नवअभिनेता सुधन पोखरेललाई एक्सन अवतारमा प्रस्तुत गरिएको छ । छायांकनअघि नै यो चलचित्रको अनाउन्समेन्ट टिजर रिलिज गरिएको हो ।

टिजरमा अभिनेता पोखरेल एक व्यक्तिले रक्षा गर्न सङ्घर्ष गरिरहेको रहस्यमय बाकसबाट निस्किरहेको अनौठो प्रकाश देखेपछि अचम्मित भावमा देखिन्छन् । निर्देशक चानस पुन मगरका अनुसार उक्त बाकसबाट निस्किएको प्रकाशलाई चलचित्रमा पौराणिक वस्तुको प्रतीकको रूपमा प्रस्तुत गरिएको छ ।

पौराणिक कथाको आधुनिक अनुकूलनमा आधारित यस थ्रिलर चलचित्रमा सुधनसँगै दीपक केसी र चिरायु पौडेललगायतका कलाकारलाई पनि देख्न सकिन्छ।

चलचित्र ‘डीएनए’लाई चानस पुन मगर र मणिरत्न त्रिपाठीले संयुक्त रूपमा लेखन र निर्देशन गर्दैछन् । चलचित्रको छायाङ्कन भने आउँदो फागुननमा सुरु गर्ने निर्माण पक्षको योजना छ । चलचित्र निर्माण फोनिक फ्लिकले गर्नेछ । त्यस्तै बड पिक्चर्स र अन्डर एक्सपोज सिनेमासँगको सहकार्य रहनेछ ।

चलचित्रमा राजु तामाङको एक्सन निर्देशन रहनेछ । चलचित्रलाई सुशान्त केसी र प्रशान्त योगीले छायांकन गर्नेछन् । सहायक छायाँकार यज्ञलाल ज्ञवाली हुन् । चलचित्रमा मानस्वी मालाकारको सङ्गीत, चिरायु पौडेलको मुख्य सहायक निर्देशन, गणेश क्षेत्रीको सम्पादन, वर्षा क्षेत्रीको कस्ट्युम डिजाइन, सुदीप पाण्डेको रङ्ग संयोजन, सुदिल धितालको साउन्ड डिजाइन, रोयल भीमसेनको पोस्टर डिजाइन तथा ट्राइडेन्ट कन्सेप्टको पब्लिसिटी डिजाइन रहनेछ ।

चलचित्रका मिडिया प्लानिङ एक्जुकेटिभ जीवन पराजुली तथा चलचित्रका निर्माता कुमार भास्कर हुन् । एसोसियट निर्माता आशिष पुडासैनी र कार्यकारी निर्माता विकास भण्डारी हुन् ।