कांग्रेसले विपद् कोषमा ५० लाख जम्मा गर्ने, राहत तथा उद्धारमा जुट्न नेता-कार्यकर्तालाई निर्देशन (भिडिओ)

काठमाडौं । सत्तारुढ नेपाली कांग्रेसले बाढीपहिरोमा पीडितहरुको राहतका लागि ५० लाख रकम प्रदान गर्ने भएको छ । आइतबार बिहान बसेको केन्द्रीय कार्यसम्पादन समिति बैठकले पार्टीका सबै पूर्वघोषित कार्यक्रमलाई स्थगित गर्दै राष्ट्रिय विपत्तिमा राहत र उद्धारमा जुट्न पार्टी पंक्तिलाई निर्देशन गर्ने निर्णय गरिएको प्रवक्ता डा. प्रकाशशरण महतले बताए ।

पार्टी सभापति शेरबहादुर देउवा निवास बूढानीलकण्ठमा बसेको बैठकमा सरकारले बनाएको राहत कोषमा पार्टीको तर्फबाट प्रदान गरिने रकममा सबै सांसदहरूले १५ दिनको तलब जम्मा गर्ने निर्णय पनि भएको छ ।

नेता महतका अनुसार एक महिने अभियानका लागि विभिन्न जिल्लामा खटाइएका केन्द्रीय प्रतिनिधिलाई राहत र उद्धार खट्न र कोजाग्रत पूर्णिमासम्मका सबै कार्यक्रम स्थगित गर्दै सो दिन पार्टीले विभिन्न चाडपर्व लक्षित चियापान कार्यक्रम समेत नगर्ने निर्णय गरेको छ ।

उनले भने, ‘सरकारलाई तत्काल राहत र उद्धारमा ध्यान दिँदै बेपत्ताको खोजी र घाइतेको निःशुल्क उपचारको व्यवस्था गर्न माग गरेका छौं ।’

कांग्रेस बैठकले राष्ट्रिय विपत्रिमा सबै राजनीतिक दल, नागरिक समाज र सबै नागरिकलाई एकजुट भएर राहत र उद्धारमा जुट्न आग्रह गर्दै चाडबाडको मुखमै परेको विपत्तिमा कालोबजारी गर्नेलाई कडा कारबाही गर्न माग गरेको छ ।

बैठकले ०८१ मंसिर १६ मा हुने स्थानीय तहको उपनिर्वाचनमा पार्टीका उम्मेदारलाई दर्ता गर्ने र सबै प्रकृया अघि बढाउन सभापति शेरबहादुर देउवालाई जिम्मेवारी निर्णय गरेको नेता महतले जानकारी दिएका छन् ।