‘बेहुली फ्रम मेघौली’ ले पायो ३३५ शो, अहिलेसम्मकै उच्च संख्या भएको दाबी

काठामडौं । भोलिबाट प्रदर्शनमा आउने चलचित्र ‘बेहुली फ्रम मेघौली’ ले नेपालमा अहिलेसम्मकै उच्च शो प्राप्त गरेको दाबी गरिएको छ । वितरक अशोक शर्माले यस चलचित्रलाई काठमाडौंभित्र र बाहिरका मल्टिप्लेक्स ता सिंगल थिएटरमा ३३५ शो मिलेको जानकारी दिए ।

गीत र ट्रेलर हिट भएकाले यो चलचित्रलाई लिएर प्रदर्शकहरुमा पनि उत्साह छ । तर, बाढी-पहिरोको प्रकोप र अझै वर्षाको सम्भावनाका कारण चलचित्रको व्यापार प्रभावित बन्न सक्ने स्थितिलाई नकार्न सकिँदैन ।

यो साता अर्को कुनै बलियो चलचित्र रिलिज नभएकाले बेहुली फ्रम मेघौलीलाई अत्यधिक शो मिलेको हो । यद्यपि, यस चलचित्रले पहिलो सातामै भरपुर विजनेस गर्नुपर्छ । दोस्रो सातामा एकैपटक छक्कापञ्जा ५, ज्वाईं साब र १२ गाउँ रिलिज हुँदैछन् ।

स्वस्तिमा खड्का र निश्चल बस्नेतले निर्माण गरेको चलचित्रमा उनीहरुकै मुख्य भूमिका रहेको छ । सजन काफ्ले र आकाश बरालले लेखन तथा निर्देशन गरेका हुन् । चलचित्रमा बसुन्धरा भुषाल, विजय बराल, सिमरन खड्का, लोकेन्द्र लेखक, रक्षा थापा, सिरु बिष्ट, आमिर गौतम, टीका पहारीलगायतको पनि अभिनय रहेको छ ।