बस्नेतको उपन्यास ‘सीमसारा’ सार्वजनिक

काठमाडौं । लेखक तथा पत्रकार वसन्त बस्नेतको उपन्यास ‘सीमसारा’ सार्वजनिक भएको छ । फिल्म निर्देशक मीनबहादुर भाम, संगीतकर्मी उज्ज्वल सागर, अस्मिता गौतम र लेखक बस्नेतले संयुक्त रूपमा लोकार्पण गरे ।

कमलादीस्थित नेपाल प्रज्ञाप्रतिष्ठानको डबलीमा आयोजित कार्यक्रममा संगीतकर्मी उज्ज्वल सागरले २० मिनेट लामो पियानो प्रस्तुति दिएका थिए । सरल भाषामा सुललीत ढंगले लेखिएको उपन्यास ‘सीमसारा’ सबै पाठकलाई रुचिकर लाग्ने उज्ज्वल सागरले बताए ।

उपन्यासमा जानकारी, ज्ञान र बौद्धिकता तीनै थोक पाएको मीन भामले बताए । उनले भने, ‘पात्रहरूको नाम चयन देखेर खुसी लाग्यो । नयाँ नाम भएको पात्रहरू मनपर्यो । उपन्यासको पात्र खुसी हुँदा खुसी भएँ । दुःखी हुँदा दुःखी भएँ । उपन्यासको समाप्तिले झनै सशक्त रूपमा छोयो ।’

कार्यक्रममा बस्नेत र अस्मिता गौतमले संवाद समेत गरेका थिए । बस्नेतले यो उपन्यास आफूले हृदय निचोरेर लेखेको बताए । यसमा आफूले बाल्यकालमा देखेको र भोगेको कथालाई औपन्यासिकरण गरेको बस्नेतको भनाइ छ ।

फाइन प्रिन्टले प्रकाशन गरेको बस्नेतको यो दोस्रो उपन्यास हो । यसअघि उनको ‘महाभारा’ उपन्यास प्रकाशित छ भने ‘७२ को विष्मय’ गैरआख्यान सार्वजनिक छ ।