रिलिजपूर्व ‘छक्का पञ्जा ५’ लाई गुड न्यूज : ब्रेकअप गीतले कटायो करोड भ्यूज

काठमाडाैं । सामाजिक सञ्जालको लखेटाइमा परिरहेको चलचित्र ‘छक्का पञ्जा ५’ ले रिलिजपूर्व एउटा ‘गुड न्यूज’ पाएको छ ।

चलचित्रको चर्चित ‘ब्रेकअप गीत’ लाई १९ दिनमै एक करोडपटक हेरिएको छ ।

गत सेप्टेम्बर १८ मा रिलिज भएलगत्तै यो गीत सामाजिक सञ्जालमा भाइरल भएको थियो ।

गीतका प्रत्येक अंशहरुमा लाखौं टिकटक भिडिओहरु बनाइएका छन् । यो क्रम अहिले पनि जारी छ । बच्चादेखि बुढासम्मले ब्रेकअप गीतमा टिकटक बनाउँदै रमाइलो गरिरहेका छन् ।

प्रेममा धोका पाएकाहरुका लागि त यो गीत मानौं ‘वरदान’ नै भएको छ । प्रेमी/प्रेमिकाप्रति रिस र कुण्ठा पोख्न उनीहरुले यो गीतको सहारा लिएका छन् ।

बाबुल गिरीले सिर्जना गरेको गीतमा बाबुल र दिपाश्री निरौलाले आवाज दिएका छन् । गीतका केही शब्दहरुमाथि विवाद पनि सिर्जना भएको थियो ।

तर, बहुसंख्यक दर्शक/स्रोतले गीत मन पराए । युट्यूवमा झण्डै ६ हजार कमेन्टहरु आइसकेका छन् । अधिकांस सकारात्मक प्रतिक्रियाहरु नै छन् ।

‘छक्का पञ्जा ५’ को अर्को ‘गीत बिहे भाको छैन’ पनि राम्रै चलिरहेको छ । यो गीतलाई अहिलेसम्म ७२ लाखपटक हेरिएको छ । चलचित्रको ट्रेलरले भने उत्साहजनक प्रतिक्रिया पाउन सकेन ।

सामान्यतया गीतको सफलताले फिल्मको व्यापारलाई बलियो टेवा पुर्याउने गर्छन् । गीतकै बलमा फिल्म हिट भएका उदाहरण पनि छन् । त्यसमाथि छक्कापञ्जा आफैंमा बलियो र सफल ब्रान्ड हो ।

असोज २४ गते छक्कापञ्जा ५ रिलिज हुँदैछ । यही मितिमा थप दुई फिल्म ज्वाईंसाब र १२ गाउँ पनि रिलिज हुनेवाला छन् । रिलिजपूर्व सामाजिक सञ्जालमा १२ गाउँको क्रेज व्यापक देखिन्छ । तर, हलमा पुग्दा कुन चलचित्रले बाजी मार्ला यसै भन्न सकिन्न ।