भिषण मुकारुङको ‘डल्ले खोर्सानी ३ बाडुल्की’ सार्वजनिक

काठमाडौं । गायक भीषण मुकारुङले दशैंको छेकोमा ‘डल्ले खोर्सानी ३ बाडुल्की’ गीत बजारमा ल्याएका छन् । यो गीत ‘डल्ले खोर्सानी सिरिज अन्तर्गत तेसो गीत हो ।

पूर्वेली लोकभाकामा निर्मित यस गीतको भिडियोमा डल्ले खुर्सानीको व्यापार गर्ने एक लजालु युवक र स्कुल पढुने छात्राबीचको प्रेमकथालाई प्रस्तुत गरिएको छ । गाउँले परिवेश समेटेर निर्माण गरिएको यस गीतको छयंकन भक्तपुरको गुण्डुमा गरिएको हो ।

गीतबारे बोल्दै गायक मुकारुङले पछिल्लो समय लोकगीत समय अनुरुप परिमार्जित हुँदै गएको बताए । तर, जति परिमार्जित हुँदै गए पनि लोकगीतले देश, काल, परिस्थिति र स्थानीय माटोको सुगन्ध छुटाउनु नहुने उनको भनाइ छ । ‘सँगै अग्रजहरुले छाडेर गएको गीतहरुलाई हामीले पुस्तान्तरण गर्दै लैजानु हाम्रो दायित्व हो,’ उनले भने ।

‘खुर्सानी डल्लेको पहिलो भिडियोले मात्रै युट्युबमा ६८ लाख बढी भ्युज प्राप्त गरेको छ । गीतमा मुकारुङको आफ्नै स्वर, शब्द र संगीत रहेको छ । मुकारुङकै युट्युब च्यानलबाट सार्वजनिक भिडियोमा एलिश राई र एलिशा राईले मोडलिङ गरेका छन् ।

मुकारुङले हालसम्म पाँच सयभन्दा बढी गीतमा स्वर दिएका छन् भने पाँच दर्जनभन्दा बढी गीतमा संगीत भरेका छन् ।