नेता बाबा सिद्धिकीको गोली हानी हत्या, लरेन्स बिश्नोई गिरोहमाथि आशंका

काठमाडौं । भारतमा एक पूर्वमन्त्रीको गोली हानी हत्या भएको छ । मुम्बईका पूर्वविधायक बाबा सिद्धिकीको गोली हानी हत्या भएको भारतीय मिडियाहरूले उल्लेख गरेका छन् ।

सिद्धिकी बान्द्रा (पूर्व) बाट तीन पटक विधायक र राज्य सरकारमा मन्त्री भइसकेका छन्। उनी यस वर्ष फेब्रुअरीमा कांग्रेस छोडेर राष्ट्रवादी कांग्रेस पार्टी (अजित पवार) मा प्रवेश गरेका थिए ।

उनका छोरा जीशान सिद्धिकी हाल बान्द्रा (पूर्व) सीटबाट विधायक छन्। हत्यामा संलग्न रहेको आशंकामा प्रहरीले दुईजनालाई पक्राउ गरेको छ । बाबा सिद्धिकीको शव पोस्टमार्टमका लागि मुम्बईको कुपर अस्पताल लगिएको छ।

मोटरसाइकलमा आएका तीन बन्दुकधारीले शनिबार राति करिब साढे ९ बजे छोराको कार्यालय बाहिर बाबा सिद्दिकीमाथि ६ राउण्ड गोली प्रहार गरेका थिए । उनलाई ६ वटा गोली लागेको थियो । प्रहरीले नियन्त्रणमा लिएकाहरु उत्तर प्रदेशका रहेको बताइएको छ ।

प्रहरीले यो घटनामा लरेन्स विष्णोई गिरोहको आशंका गरेको छ । बाबा सिद्दिकीले आफ्नो सम्पूर्ण राजनीतिक जीवन कांग्रेस पार्टीमा बिताए। तर गत फागुनमा उनी कांग्रेस छोडेर एनसीपी* प्रवेश गरेका थिए ।

*यसअघि का‌ंग्रेस छाडेर एनसीपी प्रवेश गरेको हुनुपर्नेमा अन्यथा भएकाले सच्याइएको छ ।