सभापति लामिछाने पक्राउ परेपछि रास्वपाको जिल्ला भेला स्थगित

काठमाडौं । राष्ट्रिय स्वतन्त्र पार्टी (रास्वपा)ले सभापति रवि लामिछाने पक्राउ परेपछि जिल्ला अधिवेशन तत्काललाई स्थगित गरेको छ । हिजो सभापति लामिछाने पक्राउ परेपछि आज तय भएका कार्यक्रम गरेर रास्वपाले भोलिदेखिका सबै कार्यक्रम स्थगित गरेको हो ।

रास्वपाका अधिकांश नेताहरु अहिले सभापति लामिछानेसँग पोखरा गएकाले उतै केन्द्रित छन् । रास्वपाका प्रमुख सचेतक सन्तोष परियारले राज्य नै निरन्तर रवि लामिछानेमाथि प्रहार गर्न लागिपरे पनि आफूहरु नआत्तिएको बताए ।

उनले भने, ‘पार्टीका मुख्य गतिविधिहरु भई नै रहन्छन्, तर महाधिवेशन केन्द्रित काम अब केही तलमाथि हुने नै छन् । नेतृत्वमाथि यो रवैया भएको छ । यसले पार्टीका काम अगाडि बढाउन अप्ठेरो हुन्छ नै । पार्टीको काम अघि बढ्छ, तर आजसम्म तय भएका जिल्ला भेला गर्ने र अरु अर्को सूचना नआएसम्मको लागि स्थगित गरेका छौं ।’

सरकारले देखाएको रवैयाको शान्तिपूर्ण विरोध गर्ने उनले बताए ।