कैलालीमा दुई सय ७८ जनामा संक्रमण, ४ जनाको मृत्यु

कैलाली । कैलालीमा पछिल्लो २४ घण्टामा ४ जना कोरोना संक्रमितको मृत्यु भएको छ।

सेती अस्पतालमा कैलालीका ३ जना बझाङका १ जनाको मृत्यु भएको अस्पतालका सूचना अधिकारी दिलीप कुमार श्रेष्ठले जानकारी दिए ।

उनका अनुसार कैलालीको धनगढी उपमहानगरपालिका–४ का ८१ वर्षीय पुरुष, धनगढीकै वडा नम्बर ६ की ५८ बर्सिया महिला र जोशीपुर गाउँपालिकाका ६० वर्षीय पुरुषको सङ्क्रमणबाट मृत्यु भएको हो ।

यस्तै बझाङको दुर्गाथली गाउँपालिका–१ की ८२ बर्सिया कोरोना संक्रमित महिलाको पनि बिहीबार बिहान १ बजे मृत्यु भएको सूचना अधिकारी श्रेष्ठले बताए।

दुई सय ७८ जनामा संक्रमण

कैलालीका थप दुई सय ७८ जनामा संक्रमण पुष्टि भएको सूचना अधिकारी श्रेष्ठले जानकारी दिए ।
सेती प्रादेशिक अस्पतालको प्रयोगशालामा ६ सय ५० जनामा परीक्षण गर्दा कैलालीका दुई सय ७८ सहित तीन सय ६९ जनामा संक्रमण पुष्टि भएको हो ।

धनगढी उपमहानगरपालिका एक सय १७ जनामा संक्रमण पुष्टि भएको छ । कैलालीकै अन्य स्थानीय तहमा एक सय ६१ जना संक्रमित थपिएका छन् । प्रदेशका अन्य जिल्लामा आज ९१ जनामा संक्रमण पुष्टि भएको सूचना अधिकारी श्रेष्ठले बताए ।

प्रादेशिक अस्पतालमा अहिले ५८ जना गम्भीर प्रकृतिका संक्रमितको उपचार भइरहेको छ । २० जनाको आइसियु, तीन जनाको भेन्टिलेटरमा उपचार भइरहेको छ भने अन्यको अक्सिजन सहायतामा उपचार भइरहेको अस्पतालले जानकारी दिए ।

पछिल्लो २४ घण्टामा ६ जना संक्रमण मुक्त भएका छन् भने १४ जना अस्पताल भर्ना भएका छन् ।