रुपन्देहीमा जारी रहेकाे निषेधाज्ञामा थप कडाई

रूपन्देही । काेराेना संक्रमितकाे संख्या दिनहुँ बढ्न थालेपछि जिल्ला प्रशासन कार्यालय रुपन्देहीले जारी गरेको निषेधाज्ञालाई थप कडाई गरेको छ । नयाँ भेरियन्टको संक्रमण तीब्र भर्ई धेरै नागरिक मृत्यु भइहेको र कोरोना संक्रमित थपिने दर वृद्धि भएपछि निषेधाज्ञालाई प्रशासनले थप कडाइ गरेकाे हाे ।

बिहीबार बसेको जिल्ला स्तरीय काेभिड-१९ स‌कट व्यवस्थापन केन्द्र (डीसीसीएमसी) र जिल्ला सुरक्षा समितिको बैठकले बैशाख ३० गते बिहान ६ बजेसम्म जारी भएको निषेधाज्ञामा अत्यावश्यक र मानवीय सेवा प्रवाहका लागि हरेक बैंक, बित्तीय संस्थाले एक एक जना प्राविधिक जनशक्तिबाट सेवा प्रदान गर्ने गरी सम्पूर्ण बैक र वित्तिय संस्था बन्द गर्ने निर्णय गरेको छ ।

त्यस्तै पूर्वाधार एवम् विकास निर्माण सम्बन्धमा निर्माणस्थलमा क्वारेन्टाइनमा रहेका बाहेक सबै विकास निर्माण बन्द गर्ने, खाद्यान्न लगायत अत्यावश्यक सामग्री उत्पादन गर्ने उद्योग बाहेकका सबै उद्योग अर्को निर्णय नहुँदासम्मका लागि बन्द गर्ने, हरियो तरकारी एवं कृषि उपज उत्पादक र उपभोक्ता बीच कृषि एम्बुलेन्समार्फत स्थानीय तहले व्यवस्थापन गर्ने निर्णय गरिएकाे छ ।

बिहिबार  पनि रूपन्देहीमा ७ सय ४५ जना संक्रमित थपिएका छन् भने ९ जनाकाे मृत्यु भएकाे छ ।