राहुल गान्धीले बहिनीका लागि छाडे वायनाड, संसदीय राजनीतिमा प्रियंकाको प्रवेश

नयाँ दिल्ली । स्वतन्त्र भारतका पहिलो प्रधानमन्त्री जवाहरलाल नेहरुको चौथो पुस्ताबाट अर्को सदस्यको संसदीय राजनीतिमा प्रवेश भएको छ । नेहरुकी पनातिनी प्रियंका गान्धी पहिलोपटक लोकसभा सांसद पदका लागि उम्मेदवार बनेकी छन् ।

गत लोकसभा निर्वाचनमा २ निर्वाचन क्षेत्रबाट उम्मेदवार बनेका प्रियंकाका दाजु राहुल गान्धीले छाडेको क्षेत्र केरलको वायनाडबाट प्रियंकालाई उम्मेदवार बनाउने निर्णय कांग्रेस आईले गरेको हो । उनले लोकसभा सदस्य पदका लागि उम्मेदवार नामांकन गराउँदैछिन् ।

राहुल गान्धीले ३ लाखभन्दा बढी मतको अन्तरले जितेको सो क्षेत्रमा प्रियंकालाई सहज जितको अनुमान गरिएको छ । भारतीय मिडियाले गान्धी परिवारबाट नयाँ अनुहार चुनावी राजनीतिमा देखिएको टिप्पणी गरेका छन् ।

प्रियंका पार्टीको राजनीतिमा क्रियाशील रहे पनि सांसदको रुपमा भने पहिलोपटक देखिनेछिन् । उनी आमा सोनिया गान्धीको चुनावी अभियानका क्रममा ९० को दशकबाटै कांग्रेसमा सक्रिय भएकी थिइन् । बहिनी प्रियंकाको उम्मेदवारी नामांकनका क्रममा राहुल पनि वायनाड पुगेका छन् ।