‘सानो संसार’का निर्देशक भन्छन्- हामी ‘वर्ड अफ माउथ’मा विश्वास गर्छौं

काठमाडौं । मध्यमवर्गीय परिवारको कथा भन्ने फिल्म ‘सानो संसार’ आउँदो शुक्रबारबाट पुनः प्रदर्शन हुँदैछ । गत असोज १२ गते प्रदर्शन स्थगित गरिएको ‘सानो संसार’ पुनः प्रदर्शनमा आउन लागेको हो ।

समीक्षकहरुबाट राम्रो प्रतिक्रिया पाएको यस फिल्मको व्यापारलाई त्यसवेला निरन्तर परेको झरीले प्रभावित बनाएको थियो । यसपछि प्रदर्शन रोकेको निर्माण टिमले अहिले पुनः प्रदर्शन गर्न लागेका हुन् । यो पुनः प्रदर्शनलाई लिएर आफूहरु उत्साहित रहेको निर्देशक सिद्धार्थ पुडासैनीले बताए ।

पहिलेको जस्तो हाइप नभए पनि विस्तारै फिल्मले गति पक्रनेमा आफूहरु विस्वास्त रहेको पुडासैनीको दाबी छ । उनले भने, ‘दर्शकको वर्ड अफ माउथको कारण फिल्मले गति लिन्छ भन्नेमा हामी विस्वास्त छौं । साथै फिल्मको विषयवस्तुले पनि दर्शकलाई आकर्षित गर्नेछ ।’

स्टार पावरबिना नै आफूहरुले राम्रो कथामा फिल्म बनाएको पुडासैनीको दाबी छ । आफूहरुले विषयवस्तु बेच्नकै लागि यो फिल्म बनाएकाले दर्शकको माया पाउनेमा ढुक्क रहेको बताए । उनले थपे, ‘पहिलो, दोस्रो र तेस्रो दिनपछि फिल्मले यतिकै गति लिन्छ भन्ने हाम्रो विस्वास छ ।’

‘छक्का पन्जा ५’ र ‘१२ गाउँ’को क्रेज रहे पनि, हलहरुले यी दुई फिल्मलाई बढी शो दिए पनि ‘सानो संसार’ले पाएका शोहरुमा दर्शकको चित्त बुझाउने आत्मविस्वास पुडासैनीको छ । अर्जुन कुमार निर्माता रहेको यस फिल्ममा अन्जना रिजाल, अनु दाहाल, राज पंगेनी शर्मा, सितादेवी तिमिल्सेना, जीवन गौतम लगायत कलाकारको अभिनय रहेको छ ।