अर्जुन सापकोटाले आफ्नै बिहेको फुटेज हालेर बनाएको म्युजिक भिडिओ एक नम्बर ट्रेन्डिङमा

काठमाडौं । गायक अर्जुन सापकोटा नयाँ गीत ‘दुख साटम्ला’ ले नेपालमा युट्युबको म्युजिङ ट्रेन्डिङमा शीर्षस्थान कब्जा गरेको छ । रिलिज भएको चौथो दिनमा यो गीत नम्बर १ ट्रेन्डिङमा उक्लिएको हो ।

सापकोटाको यसअघि ‘बस्यौ अलक्कै’ बोलको गीत हिट भएको थियो । ६ महिनाअगाडि सार्वजनिक भएको गीतले १ करोड २० लाख भ्यूज पाइसकेको छ । अहिले आएको नयाँ गीत पनि दर्शक/स्रोताले रुचाएसँगै उनले ब्याक टु ब्याक सफलता पाएका छन् ।

गायक सापकोटा गत २३ असोजमा दीपा सिम्खडासँग विवाह बन्धनमा बाँधिएका थिए । यो गीतको म्युजिक भिडिओमा उनले आफ्नो विवाहका वास्तविक फुटेजहरू प्रयोग गरेका छन् । म्युजिक भिडिओभित्र माओवादी नेता नारायणकाजी श्रेष्ठ पनि एक झलक देखिएका छन् । उनी अर्जुन र दिपको विहेमा शुभकामना दिन उपस्थित भएका थिए ।

गीतको रचना सन्तोष सापकोटाले गरेका हुन् । संगीत अर्जुनको आफ्नै छ । गायनमा उनलाई समीक्षा अधिकारी र देवी घर्तीले स्वर दिएका छन् ।

यो गीतलाई अहिलेसम्म ८ लाखभन्दा बढी भ्यूज मिलिसकेको छ । एक हजार १ सयभन्दा बढी प्रतिक्रियाहरू आएका छन् ।