लिग-२ मा आज अमेरिकासँग भिड्दै नेपाल, कसले गर्छ ओपनिङ ?

काठमाडौं । विश्वकप लिग २ को अर्को त्रिकोणात्मक शृङ्खला अन्तरगत नेपालले आज अमेरिकासँग उसकै घरेलु मैदानमा खेल्दैछ । लिग-२ चक्रमा नेपालको यो नवौँ खेल हो ।

आठ देश सहभागी रहेको लिग-२ को अंकतालिकामा अहिले नेपाल सातौं स्थानमा रहेको छ । ८ खेल खेल्दा नेपालले एउटा मात्रै जित निकाल्न सकेको छ भने ६ वटामा पराजित भएको छ । एक खेल भने वर्षाले रद्द भएको थियो ।

यो शृङ्खलामा अमेरिका र स्कटल्यान्ड नेपालका प्रतिद्वन्द्वी हुन् । अंकतालिकामा अमेरिका दोस्रो र स्कटल्यान्ड तेस्रो स्थानमा रहेका छन् । घरेलु टोली अमेरिका र बलियो स्कटल्यान्डविरुद्धको शृङ्खला नेपालका निम्ति सहज हुने छैन ।नेपालले यसअघि क्यानडामा खेलेका ४ खेलको शृङ्खलामा तीन हार व्यहोरेको थियो ।

अमेरिकाविरुद्ध भने नेपाल उच्च मनोबलमा छ । लिग २ अघि अमेरिकाविरुद्ध ३ खेलको टी–२० शृङ्खला नेपालले क्लीनस्वीप गरेको थियो । बलिङ, ब्याटिङ र फिल्डिङ तीनै पक्षमा नेपालले अमेरिकाभन्दा अब्बल प्रदर्शन गर्‍यो । टी २० को फर्मलाई एक दिवसीयमा पनि निरन्तरता दिनु नेपालको मुख्य चुनौती हो ।

नेपाल क्रिकेट संघ क्यानले त्रिकोणात्मक सिरिजका लागि हिजो आफ्नो स्क्वाड घोषणा गर्‍यो । रोहित पौडेलको कप्तानीमा रहेको स्क्वाडमा १५ सदस्य र रिजर्भमा दुई खेलाडी राखिएका छन् ।

यसअघि क्यानडा भ्रमणका लागि छनोट भएको एकदीवसीय टोलीमा कुनै फेरबदल गरिएको छैन । ट्राभलिङ रिजर्भमा भने देव खनालसँगै सागर ढकाल थपिएका छन् ।

सन्दीप लामिछानेको अनुपस्थितिमा अमेरिकासँगको टी २० शृङ्खलामा सागरले मौका पाएका थिए । उनको प्रदर्शन औसत रह्यो । सन्दीपले भिसा पाएर अमेरिका पुगिसकेपछि उनी लिग २ का लागि उपलब्ध भएका छन् । यो शृङ्खलामा उनको प्रदर्शन नेपालका लागि महत्त्वपूर्ण हुनेछ ।

नेपालले अन्तिम ११ खेलाडीको छनोटमा धेरै टाउको दुखाउनुपर्ने छैन । नेपालको प्लेइङ सेट लगभग स्थिर नै छ । तर, ब्याटिङ पोजिसनमा केही प्रश्नहरू छन् ।

नेपालले कुशल भुर्तेल र आसिफ शेखको स्थापित ओपनिङ जोडीलाई पछिल्लो लिग २ शृङ्खलामा गिजोलेको थियो । क्यानडामा खेलेका तीन म्याचमध्ये दुईवटामा आसिफसँग अर्जुन साउदले ओपनिङ गरेका थिए । खराब फर्मका कारण ओपनर कुशल भुर्तेल दुईवटा म्याचमा प्लेइङ ११ मा नै परेका थिएनन् ।

भुर्तेलले अमेरिकाविरुद्धको टी-२० सिरिजबाट जबरर्जस्तरूपमा आफ्नो फर्म फिर्ता ल्याएपछि उनी टीममा पर्ने निश्चित छ । टी २० मा नेपालले कुशललाई मध्यक्रममा टेस्ट गरेको थियो । ६देखि ८ नम्बरसम्म प्रयोग गरियो । तर, तेस्रो नम्बरमा खेलाउँदा उनको ब्याट चल्यो । यसर्थ कुशलले आफू टप अर्डरकै ब्याट्सम्यान भएको सूचना दिएका छन् । सम्भवतः नेपाल फेरि आसिफ र कुशलकै ओपनिङ जोडीमा फर्किन सक्छ ।

नेपालसँग भएका रिजर्भ ओपनर अर्जुन साउद छन् । उनले क्यानडामा दुई खेलमा ओपनिङ गरेका थिए, तर उल्लेख्य प्रदर्शन गर्न सकेनन् । एउटा खेलमा ५ र अर्कोमा १० रन बनाएर आउट भएका थिए । आजको खेलमा उनले आफ्नो स्थान कुशलका लागि खाली गरिदिनुपर्ने हुन सक्छ ।

नेपालसँग अर्का ओपनर अनिल साह पनि छन् । उनी आक्रामक ब्याटिङका लागि चिनिन्छन्, तर एक दिवसीयमा खासै राम्रो गर्न सकेका छैनन् । लिग २ को क्यानडा सिरिजिमा अनिललाई फिनिसरका रूपमा प्रयोग गरिएको थियो । त्यसमा सफल भएनन् दुईवटा खेलमा उनी क्रमशः १ र ३ रन बनाएर आउट भएका थिए ।

टी–२० मा अनिलले आसिफसँग नेपालको ओपनिङ गर्दै आएका छन् । एक दिवसीय फर्मका कारण आजको खेलमा उनले स्थान पाउन सक्छन् भन्न सकिने अवस्था छैन । बाँकी तीन खेलमा उनको सम्भावना हुन सक्छ ।

तेस्रो नम्बरमा नेपालले एक दिवसीयमा भीम सार्कीलाई खेलाउँदै आएको छ । पछिल्लो समय उनी उत्कृष्ट प्रदर्शनको दबाबमा छन् । क्यानडामा खासै चल्न सकेका थिएनन् । असहज अवस्थामा पनि टिकेर खेल्न सक्ने खेलाडी हुन् भीम । तर, अमेरिकाको कठिन पीचमा उनले आफूलाई प्रमाणित गर्नुपर्ने चुनौती छ । होइन भने ब्याट्सम्यानहरुबीच उनको स्थान संकटमा पर्न सक्छ ।

मध्यक्रममा कप्तान रोहित पौडेल, दीपेन्द्रसिंह ऐरी र गुल्शन झा नेपालका मुख्य ब्याट्सम्यान हुन् । रोहितले टीमको ब्याटिङमा स्थिरता दिनेछन् भने ऐरी फिनिसरको रोलमा छन् र गुल्शन झालाई आवश्यकताअनुसार विभिन्न पोजिसनमा प्रयोग गर्ने गरिएको छ । एक दिवसीयमा आरिफ शेख पनि नेपालका नियमित खेलाडी हुन् । उनलाई मध्यक्रममा खेलाइने छ । रोहित चौथो, आरिफ पाँचौं र दीपेन्द्र छैटौँ नम्बरमा आउने छन् ।

विस्फोटक ब्याट्सम्यान कुशल मल्लले स्थान पाउँछन् वा पाउँदैनन् भन्ने पनि प्रश्न छ । नेपाले अनिल शाह र कुशल मल्लमध्ये एक जनालाई रोज्न सक्छ । हुन त भीम सार्कीलाई बेन्चमा राखेर उनीहरू दुवैलाई खेलाउन सकिने अवस्था पनि हुन्छ । तेसो भएमा अनिल तेस्रो नम्बरमा र कुशल सातौँ नम्बरमा खेल्नेछन् । कुशलले स्पिन बलिङ पनि गर्न सक्ने हुँदा नेपाललाई अतिरिक्त फाइदा छ ।

बलरहरूमा भने नेपालले खासै टाउको दुखाउनुपर्ने छैन । सोमपाल कामी र करण केसी फास्ट बलिङ तथा सन्दीप लामिछानेले स्पिनर बलिङको मोर्चा सम्हाल्नेछन् । यद्यपि, पीचको अवस्था हेरेर नेपालले एक ब्याट्सम्यान घटाएर अतिरिक्त फास्ट बलर वा स्पिनर खेलाउन सक्छ । नेपालसँग स्पिनमा ललित राजवंशी र फास्टमा रिजन ढकाल पनि रहेका छन् ।