रास्वपाको जिकिर- साझेदार ठग हुँदैमा कम्पनीका सबै साझेदार अपराधी हुँदैनन्, रविलाई झुटा मुद्दा लगाइएकै हो

काठमाडौं । राष्ट्रिय स्वतन्त्र पार्टीले पार्टी सभापति रवि लामिछानेलाई सरकार राजनीतिक प्रतिशोध साँधेर बदनियत राखी पक्राउ गरी हिरासतमा राखेको भन्दै आपत्ति जनाएको छ ।

प्रवक्ता मनिष झाले एक विज्ञप्ति जारी गर्दै संसदीय छानबिन समितिले सहकारीको बचत अपचलनमा संलग्न नरहेको र सहकारीबाट ऋणसमेत नलिएको तथ्य सार्वजनिक हुँदा पनि सरकारले प्रतिशोध राखेको जिकिर गरेका छन् ।

राजनीतिक प्रतिशोध र बदनियत देखिएकाले पक्राउ पश्चात् देशका विभिन्न क्षेत्रहरुमा राष्ट्रिय स्वतन्त्र पार्टीका सदस्य, शुभचिन्तक तथा न्यायप्रेमी नागरिकहरुले विरोध प्रदर्शन गरिरहेको जनाएका छन् ।

विज्ञप्तिमा भनिएको छ, ‘विरोध र आन्दोलन कुनै आधार र कारण नै नभई गैर–कानूनीरुपमा निर्दोष व्यक्तिलाई पक्राउ गर्ने राजनीतिक पूर्वाग्रह र प्रतिशोधको खेल विरुद्ध हो भन्ने सबैमा स्पष्ट पार्न चाहन्छौं । सहकारीमा बचत रकम हिनामिना, अपचलन वा ठगी गर्न सक्ने भनेको केवल सहकारीका सञ्चालक, व्यवस्थापक, ठूला ऋणी र कर्मचारीको मिलोमतोमा मात्र हो । तर, रवि लामिछाने कुनै पनि सहकारीको सञ्चालक, व्यवस्थापक, ऋणी वा कर्मचारी नभएकाले सहकारीमा उहाँको पहुँच पुग्नै सक्दैन । यस विवादित विषयलाई संगठित अपराधसँग पनि जोडिएको छ ।’

गोर्खा मिडिया नेटवर्कमा सहकारीको पैसा आएको सन्दर्भमा कम्पनी र कम्पनीको दायित्व सम्बन्धी प्रतिपादित विश्वव्यापी सिद्धान्त अनुसार कम्पनीका निर्देशक, शेयरधारक, कर्मचारी र एजेन्टहरू अलग कानुनी व्यक्ति मानिने उल्लेख गरेका छन् ।

विज्ञप्तिमा भनिएको छ, ‘कम्पनीको साझेदार ठग, चोर, डाँका, ज्यानमारा हुँदा त्यसका आधारमा कम्पनीमा संलग्न सबै साझेदार अपराधी करार हुँदैन । साथै, कम्पनीको सिद्धान्तअनुसार पनि जुन व्यक्तिले गोर्खा मिडिया नेटवर्कमा सहकारीबाट पैसा लिई आफ्नो तर्फको ऋण स्वरुप गोर्खा मिडिया नेटवर्कमा दिने काम गर्यो सोही व्यक्तिले सजाय पाउने हो । सहकारीबाट पैसा ल्याउने काम जिवी राईले गरेको स्पष्ट रहेकाले उक्त अपचलन वापतको सजाय पाउने पनि राईले नै हो ।’

सहकारी ठगीमा कुनै संलग्नता छैन भन्ने तथ्य पुष्टि भइरहेको अवस्थामा सोही जरियामा लामिछानेमाथि मुद्दा उठान हुन नसक्ने रास्वपाको दाबी छ ।

सहकारी ठगी मुद्दामा पक्राउ गरी अनुसन्धानका लागि निरन्तर हिरासतमा राख्नु न्यायोचित नहुने भन्दै अनुसन्धानको कुनै विषय बाँकी रहेको देखिएकै खण्डमा पनि हाजिरी, जमानी, धरौटीमा राखी हिरासतमा नलिइ पनि अनुसन्धान गर्न माग गरेका छन् ।

विज्ञप्तिमा उल्लेख छ, ‘सभापति रवि लामिछानेलाई झुटा मुद्दा लगाएर थुन्नु राजनीतिक प्रतिशोध हो । सरकारले अधिनायकवादी रवैया प्रस्तुत गरी झुठा मुद्दा लगाएर उहाँलाई गैरकानुनी थुनामा राखेकाले रास्वपाले घोर भर्त्सना गर्दछ । यो सभापति रवि लामिछाने एक व्यक्तिको पक्षमा मात्र होइन, दुई तिहाईको सरकारले आफूलाई मन नपर्ने कसैलाई पनि राजनीतिक पूर्वाग्रह प्रेरित भएर थुनामा राख्न सक्ने नजिर बन्न नदिनका लागि गरिएको खबरदारी हो ।’