‘पूर्णबहादुरको सारङ्गी’ मा दर्शकको उभार, भारतीय फिल्महरु पाखा लाग्दै

काठमाडौं । विजय बरालको मुख्य भूमिका रहेको चलचित्र ‘पूर्णबहादुरको सारङ्गी’ व्यवसायिक सफलतातर्फ लम्किएको छ । बाबु-छोराको सम्बन्धमा बुनिएको यो मार्मिक चलचित्रलाई तिहारको बिदामा दर्शकले बलियो साथ दिइरहेका छन् ।

बिहीबार चलचित्रको रिलिज हुँदा दर्शकको उपस्थिति त्यति उत्साहजनक थिएन, तर वर्ड अफ माउथ बलियो हुँदा भोलिपल्टदेखि हलहरु भरिन थाले । शुक्रबारबाट पिकअप लिएको चलचित्रले आइतबारसम्म आइपुग्दा निर्माताको अनुहारमा मुस्कान भरिदिएको छ । हलहरु हाउसफुल छन् ।

दशैंमा चम्केको नेपाली चलचित्रको बजारले तिहारमा पनि निरन्तरता पाएको हो । दशैंमा तीन वटा नेपाली चलचित्र एकसाथ रिलिज भएका थिए । तीमध्ये ‘छक्कापञ्जा ५’ र ‘१२ गाउँ’ ब्लकबस्टर भए भने ‘ज्वाइँ साब’ ले पनि लगानी उठायो । ‘छक्कापञ्जा ५’ र ‘१२ गाउँँ’ अहिले पनि हलहरुबाट उत्रिसकेका छैनन् । यद्यपि ‘पूर्णबहादुरको सारङ्गी’ ले ती दुवै चलचित्रको चर्चालाई ओझेलमा पारिदिएको छ ।

यो चलचित्र रिलिज हुँदा प्रदर्शकहरुले त्यति विश्वास गरेका थिएनन् । उनीहरुले यसै साता रिलिज भएका दुई भारतीय चलचित्र ‘भुलभुलैया ३’ र ‘सिंघम एगेन’ को तुलनामा न्यून शो दिएका थिए, तर दर्शकको चाप बढेसँगै प्रदर्शकहरु ‘पूर्णबहादुरको सारङ्गी’ लाई शो थप्न बाध्य भएका छन् । भारतीय फिल्महरुले कब्जा गरेको शो खोसेर ‘पूर्णबहादुरको सारङ्गी’लाई दिइएको हो । दुवै भारतीय फिल्ममा नेपाली दर्शकको खासै आकर्षण देखिएको छैन ।

देशकै ठूलो मल्टिप्लेक्स चेन क्यूएफएक्सले सुरुको दिन यो चलचित्रलाई देशभरि जम्मा ३८ शो दिएको थियो, तर दर्शकको चाप बढेपछि आज काठमाडौंमा ३१ र मोफसलमा ३३ गरी कुल ६४ शो उपलब्ध गराइएको छ । अन्इअलहरुले पनि सुरुमा तीन-तीन शो दिएकोमा अहिले सात शोसम्म पुर्‍याएका छन् । केही हलहरुले मध्यरातसम्म शो राख्नुपरेको र प्रि-बुकिङ उत्साहजनक रहेको जनाइएको छ ।

प्राप्त शोमा चलचित्रको अकुपेन्सी ८० देखि शत प्रतिशतसम्म देखिन्छ । अहिलेसम्म निर्माण पक्षले चलचित्रको कलेक्सन सार्वजनिक गरेको छैन । दर्शकको मागअनुसार शो बढाएकोमा

यो चलचित्र हेर्ने दर्शकले निकै सकारात्मक प्रतिक्रिया दिइरहेका छन् । चलचित्र हेर्दा आँसु थाम्न गाह्रो भएको अधिकांश दर्शकको प्रतिक्रिया छ । चलचित्रको प्रवर्द्धनका लागि हलमा पुगेका कलाकारहरुलाई नै दर्शकले अंगालो हालेर रोइरहेका भिडिओहरु सार्वजनिक भएका छन् ।

चलचित्र रिलिज हुनु अगाडि ‘काँधेकुरी’ बोलको गीत टिकटकमा भाइरल भएको थियो । यही गीतले यो चलचित्रको हाइपलाई माथि उठाउन सफल भएको हो । चलचित्र रिलिज भएपछि यसको कन्टेन्टलाई दर्शकले मन पराए । फलतः ठूलो स्टारकास्टविना पनि चलचित्रले बक्स अफिस गुलजार बनाउन सफल भयो ।