रोहन मुस्तफा रोयल्समा अनुबन्धित

काठमाडौं। एसोसिएट क्रिकेटका परिचित खेलाडी रोहन मुस्तफालाई नेपाल प्रिमियर लिग (एनपिएल)का लागि सुदुरपश्चिम रोयल्सले आबद्ध गरेको छ।

यूएईबाट अन्तर्राष्ट्रिय क्रिकेट खेल्दै आएका रोहनले यसअघि पनि नेपालमा सम्पन्न विभिन्न प्रतियोगिता खेलेका थिए।

यूएईका पूर्व कप्तान समेत रहेका ३६ वर्षीय रोहनले ओडीआई र टी-२० आईमा उत्कृष्ट अलराउण्ड प्रदर्शन गर्दै आएका छन्। बायाँ हाते ब्याटर उनले ५८ टि – २० आईमा १ हजार माथि रन जोड्नुका साथै ६१ विकेट पनि लिएका छन्।

एकै ओडीआईमा शतक प्रहार गर्नुका साथै ५ विकेट लिने दुर्लभ कीर्तिमान पनि उनको नाममा छ । रोयल्सले यसअघि विदेशी खेलाडीको रुपमा न्युजिल्याण्डका बलिङ अलराउन्डर स्कट कुगेलेइन, स्कटल्यान्डका अलराउन्डर ब्रान्डन मक्मलेन र इंग्लिस क्रिकेटर सेफ अलि जेबलाई अनुबन्ध गरिसकेको छ ।

त्यस्तै अस्ट्रेलियाका विश्वकप विजेता पूर्व क्रिकेटर ब्राड हज प्रमुख मेन्टर छन् । दीपेन्द्र सिंह ऐरी मार्की खेलाडी रहेको सुदूरपश्चिम रोयल्सको मुख्य प्रशिक्षकमा जगत टमाटा रहेका छन् ।