केनेडीदेखि मस्कसम्मः ट्रम्पलाई जिताउन अहोरात्र खटिएका यी चार अमेरिकी हेभिवेट

काठमाडौं । आज प्रारम्भिक नतिजा आएपछि अमेरिकी चुनावमा डोनाल्ड ट्रम्पको माहोल राम्रो देखिएको छ । उनले सन २०२० मा जो बाइडेनसँग चुनाव हार्दा ल्याएको २३३ इलेक्टर मत भन्दा धेरै मत ल्याइसकेका छन् ।

यो सामाग्री तयार गर्दासम्म फक्स न्यूजले ट्रम्पले चुनाव जितिसकेको बताएको छ । यस्तै न्यू योर्क टाइम्सले ३०१ अंक ल्याएर ट्रम्पले जित्ने सम्भावना भएको देखाइसकेको छ ।

यही मेसोमा यहाँ ट्रम्पलाई चुनाव जिताउने अभियानमा सर्वाधिक खटेका चार अमेरिकी हेभिवेट अनुहारहरूको चर्चा गरिएको छ ।

१. रोबर्ट एफ. केनेडी जुनियर

उनी हत्या गरिएका अमेरिकी राष्ट्रपति जोन एफ। केनेडीका भाइका छोरा हुन् । उनका बाबु तथा राष्ट्रपति उम्मेदवार रिचर्ड एफ केनेडीको पनि हत्या गरिएको थियो ।

उनी आजीवन डेमोक्रेटिक पार्टीका थिए । पार्टीसँग बिच्किएर पनि स्वतन्त्र उम्मेदवार पनि थिए । गत अगस्टबाट भने उनले स्वतन्त्र उम्मेदवारी छोडे । ट्रम्पलाई समर्थन गरे ।

ट्रम्पका सबैजसो हाइप्रोफाइल चुनावीसभामा उनी पुगे । भाषण गरे । ट्रम्पले पनि उनका पिताका गोप्य हत्याका फाइल सार्वजनिक गर्ने वाचा गरे ।

२. तुल्सी गाबार्ड

उनी सन २०२० को डेमोक्रेटिक पार्टीकी राष्ट्रपतीय उम्मेदवार एक हुन । उनले जो बाइडन, कमला ह्यारिस, बर्नि स्यान्डर्स लगायतका अनुहारहरूसँग एकै लहरमा उभिएर चुनावी बहस पनि गरेकी थिइन् । त्यो भिडिओ अझै भाइरल छ ।

खासगरि उनले कमलालाई लाएको आरोपको मुद्दा अहिले लोकप्रिय भएको छ । कमलाले गाँजा खाने सयौँलाई थुनेको तर आफैँ गाँजा खाएको प्रश्नमा हाँसोको तथा उनले अदालतले बन्द नगर नभनुन्जेल अश्वेत र अल्संख्यकलाई विभिन्न कसुरमा अभियोजनकर्ता हुँदा थुनेको तुलसीको आरोप छ त्यहाँ ।

तुलसी ट्रम्पले चुनाव जितेको खण्डमा समूहमा बस्ने बताइएको छ । सन २०२२ अक्टोबरमा उनले डेमोक्रेटिक पार्टी छोडिन् । सन २०२४ अगस्टमा आएर ट्रम्पलाई समर्थन गरिन् । योबारेमा ट्रम्पले पनि ‘सरप्राइज’ भनेका थिए ।

अहिले महिला विरोध भनेर जति पनि ट्रम्पको विरोधमा अभियानहरू भएका छन्, ती सबैको रक्षा कवचको रूपमा तुल्सी उभिएकी छिन् ।

देश दौडाहामा पुगेर उनले डेमोक्रेटिक पार्टी जनताको र शान्तिको दल नभएको भन्दै अहिले ट्रम्प युद्ध विरोधी भएको भन्दै उनको पक्षमा उभिएको बताइरहिन् ।

३. टकर कार्ल्सन

अमेरिकी केबल च्यानलहरूमा सबैभन्दा धेरै चलेका नाम थिए टकर कार्ल्सन । तर, फक्स न्यूजले सन २०२३ अप्रिल २४ मा उनलाई अफएयर गर्ने अर्थात् हटाउने भनेर सीइओ सुजन स्कटले कार्ल्सनलाई सुनाइन् ।

कुनै खास कारण बिना निकालिएका कार्ल्सनले छोड्नुको कारण डेमोक्रेटिक पार्टी र सत्ताका दबाब भन्ने धेरैले अनुमान गरे ।

फक्स छोडेका कार्ल्सनले स्वतन्त्र मिडिया चलाउन थाले । सामाजिक सञ्जाल र वेबसाइटबाट उनले चलाए ।

गत फेब्रुअरी ८ मा प्रशारण गरिएको रुसी राष्ट्रपति भ्यादिमिर पुटिनसँगको उनको कुराकानीले उनी चाँडै चर्चामा आउन सफल भए ।

उनले ट्रम्पसँग अन्तरवार्ता गर्ने मात्रै होइन उनका चुनावी सभामा गएर बोल्न थाले । समर्थन दिन थाले ।

४. एलन मस्क

गत जुलाई १३ मा अमेरिकाको पेन्सिलभेनिया राज्यका बट्लरमा ट्रम्पलाई गोली प्रहार गरियो ।

हत्या प्रयासले प्रहार गरिएको गोली उनको कानमा लाग्यो । त्यही गोली प्रहारपछि टेस्ला, स्पेस एक्स तथा एक्स (साबिकको ट्विटर)का मालिक एलन मस्कले समर्थन गरे । पछि पछि त उनी राजनीतिक सभाहरूमै पुगेर भाषण गरे ।

कमलाले जितेमा एक्स बन्द हुने, अमेरिकामा पछि पर्ने लगायतका विभिन्न तर्कहरू र ट्विटहरू उनले गरिरहे ।