के अझै विदेशी फिल्मको मोहजालमा छन् हल सञ्चालक ? दीपकराज र निश्चलबीच आरोप-प्रत्यारोप

काठमाडौं । नेपाली चलचित्र उद्योगका दुई ‘पावरसेन्टर’ दीपकराज गिरी र निश्चल बस्नेत फेसबुकमा आमनेसामने भएका छन् । उनीहरुबीच विवादको विषय हो- नेपाली चलचित्रलाई प्रदर्शकहरूले पर्याप्त शो नदिनु ।

नेपालका हल सञ्चालकहरूले विगतदेखि नै विदेशी चलचित्रप्रति मोह देखाएर स्वदेशी चलचित्रलाई हेपाहा व्यवहार गर्दै आएका छन् । उनीहरूको यस्तो प्रवृत्तिका कारण प्रत्येक पटक ठूला बजेटका भारतीय फिल्म रिलिज हुँदा नेपाली चलचित्र मारमा पर्ने गरेको पाइन्छ । थुप्रै चलचित्रकर्मीले यस विषयमा आवाज पनि उठाउने गरेका छन् । जसमध्ये अग्रपंतिमा पर्छन् निश्चल ।

उनले आफ्नो अघिल्लो फिल्म ‘दिमाग खराब’ ले पर्याप्त शो नपाएको भन्दै हलबाटै उतार्ने निर्णय लिएका थिए । यस पटक ‘बेहुली फ्रम मेघौली’ मा पनि यस्तै भयो । राम्रो व्यापार गर्दा गर्दै थोरै शोमा खुम्चिएपछि उनले हलबाट उतारेर ओटीटीतर्फ लगाएका छन् ।

अहिले घरेलु दर्शकमा नेपाली चलचित्रप्रति अभूतपूर्व क्रेज छ । तिहारअघि रिलिज भएको ‘पूर्णबहादुरको सारंगी’ ले दर्शकको भेल मात्र उरालेको छैन, सामाजिक सञ्जालमा समेत सर्वाधिक चर्चाको विषय बनिरहेको छ ।

स्मरणीय छ कि यो चलचित्रलाई पनि रिलिज हुँदा प्रदर्शकहरूले थोरै शो दिएका थिए । दर्शकको उच्च माग भएपछि हलहरू शो थप्न बाध्य भए । यही विषयमा दीपकराज र निश्चल बस्नेतले फेसबुकमा एक अर्कालाई कटाक्ष हानेका हुन् ।

दीपकराजले कसैलाई पनि ईंगित नगरीकन एउटा स्टाटस लेखेका थिए, जसले निश्चललाई क्रुद्ध तुल्यायो ।

उनले लेखेका थिए, ‘प्राय हलहरूले शो दिएन भनेर हामी उफ्रिन्छौँ । तर हेरौँ त… नगण्य शोबाट सुरु भएको सारंगीले आफूलाई कहाँ पुर्‍यायो ? योभन्दा पहिले १२ गाउँ त्यस्तै । समस्या कहाँ रहेछ त ?’

निश्चलले यो स्टाटस दीपकले आफूलाई नै टार्गेट गरेर लेखेको ठाने । उनी जवाफ नफर्काई बस्न सकेनन् । दीपकराजको नाम नलिईकन उनले कडा कटाक्ष हानेका छन् ।

उनको स्टाटस यस्तो:

कोही चलचित्रकर्मी जो आजकाल हल पनि चलाउँछन्। ले मौका पाएर ठूलो गफ छाडिहालेछन्, नेपाली चलचित्रले राम्रो गर्दै गएपछि शो बडेको बडै छ त भन्दै । हो हजुर हो । विदेशी फिल्म राम्रो हुन्छ भनेर जुन दिमागले पहिल्यै सोच्छ र छरपस्ट शो दिन्छ नी त्यही दिमागले नेपाली फिल्म पनि राम्रो हुन्छ सुरुमै राम्रो शो दिनुपर्छ भनेर किन सोच्न सक्दैन ? सधैँ नेपाली फिल्मले चैँ प्रमाणित गरिरहनु पर्ने हो ? निर्माताले शो थपिदिनुन भनेर गुहार्नु पर्ने नै हो ? प्रस्ट छ । विदेशी फिल्मको शो घटाएर नेपाली फिल्मलाई दिएका छौँ भनेर भ्रम नछर्दा हुन्छ । नेपाली फिल्मले दर्शक खोजेको हो , हलसम्म आफ्नो बलबुताले ल्याएको हो । यो फिल्मले राम्रो दाम ल्याउँछ भनेर प्रमाणित गरेपछि मात्र शो थपिएको हो । विदेशी फिल्म पनि हात्ती आयो हात्ती आयो फुस्सा भएपछि शो घटाइएको हो !! कमसेकम चलचित्र बनाइरहेको व्यक्तिले यतिसम्म बोल्लान् सोचेको थिएन । बोल्नभयो, ठिक गर्नुभयो । चिनियो ।

निश्चलको यो स्टटासमा दीपकराजको जवाफ आएको छैन । आज उनले एक स्टाटस लेख्दै मौनता नै सबैभन्दा ठूलो जवाफ भएको बताएका छन् ।