‘पूर्णबहादुरको सारंगी’ ले बनायो सर्वाधिक ‘शो’ को कीर्तिमान, दैनिक व्यापार डेढ करोडमाथि

काठमाडौं । सरोज पौडेल निर्देशित ‘पूर्णबहादुरको सारंगी’ले अहिलेसम्मकै सर्वाधिक ‘शो’ पाउने नेपाली चलचित्रको कीर्तिमान बनाएको छ । वितरकका अनुसार आज हलहरुले यस चलचित्रलाई ३८० भन्दा बढी शो दिएका छन् ।

यसअघि ‘बेहुली फ्रम मेघौली’ ले देशभरि ३३५ शो पाएर कीर्तिमान बनाएको थियो । तर, एक महिनाभित्रै उक्त रेकर्ड ब्रेक भएको हो । ‘बेहुली फ्रम मेघौली’ सोलो रिलिज भएकाले सुरुवातमै त्यति धेरै शो पाएको थियो । जबकि पूर्णबहादुरको सारंगीलाई सुरुमा हलवालाहरुले पत्याएका थिएनन् ।

कात्तिक १५ बाट प्रदर्शन भएको यस चलचित्रलाई पहिलो दिन नेपालभरि जम्मा १०८ शो मात्र दिइयो । तिहारको अघिल्लो दिन शुक्रबार दुई भारतीय फिल्म रिलिज भएसँगै हलहरुले यस चलचित्रलाई जम्मा ५७ शोमा खुम्च्याइदिए । भारतीय चलचित्र ‘सिंघम अगेन’ लाई उनीहरुले १२१ शो र ‘भुलभुलैया ३’ लाई ८३ शो दिएका थिए ।

तर, ‘पूर्णबहादुरको सारंगी’ले दर्शकको अभूतपूर्व माया र साथ पायो । माउथ पब्लिसिटी व्यापक भएपछि हल सञ्चालकहरुले यस फिल्मको शो थप्न वाध्य भए ।

वितरक प्रचण्डमान श्रेष्ठका अनुसार ‘पूर्णबहादुरको सारंगी’ले आज ४०० भन्दा बढी शोहरु पाएको छ । उनले भने, ‘अष्टनारायण हल लगायत हलहरुले दिएको शोहरुको हिसाबकिताब राम्रोसँग आएको छैन । देशव्यापी रुपमा यो फिल्मले आज ४०० बढी शोहरु पाएको छ ।’

चलचित्रले आधिकारिकरुपमा ३८० भन्दा बढी शो चलिरहेको बताएको छ ।

शो बढेसँगै चलचित्रको व्यापारमा रफ्तारमा छ । पहिलो र दोस्रो दिन फिल्मले ठिकठिकैको व्यापार गरे पनि तेस्रो दिनबाट व्यापारको ग्राफ उकालो लागेको बितरक श्रेष्ठ बताउँछन् ।

‘तेस्रो दिनदेखि निरन्तर डेढ करोडभन्दा माथिको व्यापार भइरहेको छ । बक्स अफिसको रिपोर्ट आउन भने आइसकेको छैन ।’

करिब डेढ करोड लागतमा बनेको फिल्मले अनुमानित ८.२५ करोडमाथिको व्यापार गरिसकेको छ । क्यूएफएक्सले चलचित्रलाई ‘सुपरहिट’ को श्रेणीमा राखिसकेको छ । अहिले पनि हलमा दर्शक खचाखच छन् । टिकट सहजै पाउने अवस्था छैन । दर्शकको डिमान्डका कारण कतिपय हलहरुले मध्यरातमा पनि फिल्म चलाएका छन् ।

भोलि शुक्रबार कुनै पनि नेपाली र विदेशी चलचित्र नभएकाले दर्शकहरु पूर्णरुपमा ‘पूर्णबहादुरको सारंगी’ मै एकोहोरिने स्थिति छ । अहिलेको रफ्तार हेर्दा नेपाली चलचित्रको इतिहासमै सर्वाधिक कमाइको रेकर्ड पनि राख्न सक्छ ।

सरोज पौडेलको लेखन तथा निर्देशनमा बनेको यस फिल्ममा विजय बराल मुख्य भूमिकामा छन् । बरालको साथमा प्रकाश सपूत, अन्जना बराइली, भोलाराज सापकोटा, मुकुन भुसाल, बुद्धि तामाङ लगायत कलाकारको अभिनय रहेको छ ।