लुम्बिनीमा उपनिर्वाचन: ६ रिक्त पदमा त्रिपक्षीय भिडन्त, कस्ताे छ तीन दलकाे तयारी ?

रुपन्देही । स्थानीय तहमा मंसिर १६ गते हुने उपनिर्वाचनमा लुम्बिनीमा रिक्त रहेका ६ पदमा तीन ठूला दलबीच प्रतिस्पर्धा हुने देखिएकाे छ । रिक्त ६ पदमा यसअघिको निर्वाचनमा नेपाली कांग्रेसबाट ४ जना र माओवादीबाट २ जना निर्वाचित भएका थिए ।

एमालेले ६ मध्ये कुनै पदमा जितेको थिएन । अहिले पुरानो अवस्था केही फेरिएको छ । ०७९ को निर्वाचनमा कांग्रेस–माओवादीसहित ५ दलको अधिकांश स्थानमा गठबन्धन रहेको थियो तर अहिले केन्द्र र प्रदेशमा एमाले–कांग्रेसको गठबन्धन रहेको छ । त्यो कारणले पनि तीनै दलले यी स्थानमा आफ्नो वर्चश्व राख्न चाहन्छन् ।

माओवादीले रुकुमपूर्वको पुथाउत्तर गंगा गाउँपालिका उपाध्यक्ष र सोही पालिकाको वडा नं २ को अध्यक्ष जितेको ठाउँ हो । अहिले त्यो स्थान माओवादीबाट खोस्नका लागि एमाले कांग्रेस गठबन्धन गरेरै जाने तयारी गरेका छन् । यद्यपि भागवण्डा नमिलेकोले अझै टुंगो लागेको छैन ।

कांग्रेस एमाले नमिले यहाँ माओवादीले नै जित्ने निश्चित रहेको बुझाई स्थानीय नेताहरुको छ । उनीहरु दुवै दल मिलेपनि माओवादीले केन्द्रको संयन्त्रअनुसार विप्लव नेतृत्वको नेकपा माओवादी र नेकपाएस र जसपासँग साथ लिने तयारीमा छ ।

सो क्षेत्रमा विप्लव नेतृत्वको पार्टीका केही सुरक्षित मत रहेको आंकलन माओवादी केन्द्रको रहेको छ । माओवादीका प्रदेश अध्यक्ष सुदर्शन बराल एमाले कांग्रेस मिलेपनि अन्य दलको साथ लिएर आफूहरुले जितेको स्थान सुरक्षित गर्ने रणनीतिमा लागेको बताउँछन् ।

एमाले प्रदेश अध्यक्ष राधाकृष्ण कंडेल ६ मध्ये कम्तीमा ३ स्थानमा आफूले जित्नेगरी लागेको बताउँछन् । ०७९ र अहिलेको अवस्था धेरै फेरिएको बताउँदै उनले यसले पार्टीको जनाधारलाई पनि विश्लेषण गर्ने भएकाले सोहीअनुसार योजना बनाएको जनाए ।

यसैगरी संसदको चौथो ठूलो दलले पनि स्थानीय तहको उपनिर्वाचनमा आफ्नो मत सुरक्षित बनाउने रणनीतिमा लागेको छ । पार्टी केन्द्रले लुम्बिनीमा कुसुम महर्जनलाई उपनिर्वाचनको कमाण्डर तोकेर पठाएको छ । कांग्रेस प्रदेश कोषाध्यक्ष प्रकाश रानाका अनुसार पार्टीले यसअघि जितेका ४ स्थानमा यथावत राख्ने र केही थप गर्नेगरी योजना बनाइएको बताए ।

कहाँ कहाँ हुँदैछ निर्वाचन रु कस्तो थियो ०७९ को मत परिणाम ?

रुकुम पूर्वको पुथा उत्तरगंगा गाउँपालिका उपाध्यक्षको निधनपछि यहाँ उपनिर्वाचन हुँदैछ । गत निर्वाचनमा यो गाउँपालिका उपाध्यक्षमा माओवादी केन्द्रका भुपेन्द्रा बुढा ४ हजार ५९ मत पाएर निर्वाचित भएकी थिइन् ।

उनका निकटम प्रतिस्पर्धी कांग्रेसका कमला कुमारी मल्लले २ हजार १० मत र एमालेका धर्म घर्ती बुढाले १ हजार ८१२ मत पाएका थिए । अहिले यहाँ तीनै दलले आफ्नो अस्तित्वका लागि हेरिरहेका छन् ।

सोही गाउँपालिकाको वडा नम्बर २ का वडाध्यक्षको मृत्युपछि उपनिर्वाचन हुँदैछ । गत निर्वाचनमा माओवादी केन्द्रका जसबहादुर श्रीपाली २३४ मत पाएर यो वडाको वडा अध्यक्षमा निर्वाचित भएका थिए । उनका प्रतिस्पर्धी कांग्रेसका कर्णबहादुर बुढाले १७९ मत पाएका थिए ।

गुल्मीको मुसीकोट नगरपालिका वडा नम्बर १ मा वडाध्यक्ष मोहन घिमिरेको निधनका कारण यहाँ उपनिर्वाचन हुँदैछ । गत निर्वाचनमा कांग्रेसबाट वडाध्यक्षमा निर्वाचित घिमिरेले १ हजार १८२ मत पाएका थिए । उनका प्रतिस्पर्धी एमालेका नारायण बहादुर थापाले १ हजार १४३ मत ल्याएका थिए ।

यता रोल्पाको रुन्टीगढी गाउँपालिका वडा नम्बर ४ मा कांग्रेसका टंकबहादुर पुन ४८८ मत पाएर विजयी भएका थिए । उनका प्रतिस्पर्धी एमालेका वेगम पुनले ४८० र माओवादीका शिवलाल रोकाले २०३ मत पाएका थिए ।

बर्दियाको ठाकुरबाबा नगरपालिका वडा नम्बर ४ वडाध्यक्ष सुर्यबहादुर विष्ट जिल्ला समन्वय समिति प्रमुखमा निर्वाचित भएपछि यहाँको वडाअध्यक्ष पद खाली भएको थियो । गत निर्वाचनमा विष्टले १ हजार २०९ मत पाएका थिए भने उनका प्रतिस्पर्धी एमालेका नारायण अधिकारीले ५८० मत पाएका थिए ।

यस्तै उपनिर्वाचन हुन लागेको कपिलवस्तुको शुद्धोधन गाउँपालिका वडा नम्बर १ मा यसअघिको निर्वाचनमा कांग्रेसका तिलकराम यादवले १ हजार ३२ मत पाएर विजयी भएका थिए । उनका प्रतिस्पर्धी एमालेका अब्दुल मोजीव खाँले ८८९ मत पाएका थिए ।

कुन दलले उम्मेदवार कसरी छाने ?

एमालेले सबै स्थानमा सर्वसम्मत उम्मेदवार टुंगो लगाइसकेको छ । कांग्रेस र माओवादीले सार्वजनिक गरिसकेका छैनन् ।

एमालेबाट रुकुमपूर्वको पुथा उत्तरगंगाको उपाध्यक्षमा केशकुमारी तुलाचन, वडा नं २ को अध्यक्षमा जीवन रोका, गुल्मी मुसिकोट नगरपालिका वडा नं १ को अध्यक्षमा दलबहादुर थापा, बर्दिया ठाकुरबाबा नगरपालिका वडा नं ४ मा विष्णुप्रसाद सापकोटा, कपिलवस्तु शुद्धोधन गाउापालिका वडा नं १ मा अब्दुल मोजिन खाँ, रोल्पा रुन्टिगढी गाउँपालिका ४ को अध्यक्षमा बेगम पुनलाई उम्मेदवार बनाइएको एमाले लुम्बिनीका कार्यालय सचिव कृष्ण खनालले जानकारी दिए ।

माओवादी केन्द्रका प्रदेश अध्यक्ष सुदर्शन बरालले सबै जिल्लामा उम्मेदवार टुंगो लगाउन बैठक बसिरहेको र शनिबारसम्म टुंगो लाग्ने जनाए । कांग्रेस प्रदेश कोषाध्यक्ष प्रकाश रानाले सबै जिल्लामा सवैसम्मत उम्मेदवार टुंगो लागेपनि नाम सार्वजनिक नगरिएको र शनिबारसम्म आउने जनाए ।