अब मिस्टर बिस्टको कन्टेन्ट नेपाली भाषामा, सारस अधिकारी अनुवादक नियुक्त

काठमाडौं । संसारकै सबैभन्दा बढी सब्सक्राइबर भएको युट्युब च्यानल मिस्टर बिस्टको कम्पनी क्रियटर ग्लोबलले नेपाली डब आर्टिस्ट र भाषा संयोजक राखेर भिडियो ल्याउने भएको छ । भाषा संयोजकका लागि सारस शर्मा अधिकारीलाई छनोट गरेको छ ।

अधिकारीको काम भनेको नेपाली भाषाको सब टाइटल र डबिङ ठिक छ कि छैन भनेर चेक गर्नु हो । अधिकारीले चेक गरिसकेपछि उक्त कन्टेन्ट पास हुन्छ ।

क्रियटर ग्लोबलले छनोट गरेको विषयमा अधिकारीले भने, ‘मिस्टर बिस्टको सय मिलियन डलरको शो आउँदैछ । यो शो विश्वका विभिन्न भाषाहरुमा डबिङ भइरहेको छ । नेपाली भाषाको पनि डबिङ हुनसक्छ वा सबटाइटल मात्रै पनि हुनसक्छ । यी कामको कोअर्डिनेटरको रुपमा मलाई नियुक्त गरिएको हो ।’

मिस्टर बिस्टले रियालिटी शो अमेजन प्राइममा ल्याउने तयारी गरिरहेका छन् । यो शो संसारभरका विभिन्न प्रमुख भाषाहरुमा डबिङ हुनेछ भने विजेताले पाँच लाख मिलियन पुरस्कार पाउनेछ । यसैक्रममा ग्लोबल क्रियटरले नेपाली भाषाका लागि अधिकारीलाई नियुक्त गरेको हो ।

साथै युट्युबमा पनि नेपाली भाषामा मिस्टर बिस्टले काम गरिरहेको छ । केही सर्ट भिडियोहरुमा डबिङ पनि गरिरहेको छ । आफ्नो नियुक्तिबारे अधिकारीले भने, ‘मिस्टर बिस्टको कम्पनीमा आधिकारिक रुपमा तलब खाने म नै पहिलो नेपाली हो ।’

ग्लोबल क्रियटरले एक महिनाअघि कोअर्डिनेटरको विज्ञापन खुलाएको थियो । यसका लागि सुरुमा अधिकारीले सिभी बुझाए । सिभी बुझाइसकेपछि उनलाई केही टास्कहरु दिइयो ।

उक्त टास्कमा नेपाली भाषाको शुद्धाशुद्धीदेखि अरु कामहरु दिइएको थियो । त्यो पनि पास गरेपछि अन्तर्वार्तामा पनि अधिकारी पास भएका थिए ।