विजय बरालको प्रशंसा गर्दै मुकुन भुसालले लेखे -तेरो उचाइ सगरमाथा झै उच्च भएकोमा म निकै खुसी छु

काठमाडौं । अहिले सबै हलमा हाउस फुल मनाइरहेको नेपाली चलचित्र पूर्णबहादुरको सारङ्गीका कलाकार मुकुन भुसालले उक्त चलचित्रका मुख्य कलाकार विजय बरालको सामाजिक सञ्जालबाट प्रशंसा गरेका छन् । उनले सामाजिक सञ्जाल फेसबुकमा स्ट्याटसमार्फत बरालको उचाइ सगरमाथा झै उच्च भएकोमा आफू निकै खुसी भएको बताएका छन् ।

कलाकार भुसालले यो केबल बरालको अथक मेहनत र कलाकारितामा दिएको निरन्तरताको फल भएको उल्लेख गर्दै यो यात्रामा आफू जोडिन पाउनु आफ्नो सौभाग्य भएको भन्दै बराललाई आगामी दिनका लागि शुभकामना दिएका छन् ।

उनले लेखेका छन्, ‘प्रिय पूर्णे, आजको दिनसम्म आइपुग्दा तेरो उचाइ सगरमाथा झै उच्च भएकोमा म तेरो लागि निकै खुसी छु यो केबल तेरो अथक मिहेनत र कलाकारितामा तैँले दिएको निरन्तरता को फल हो हिजो फलानाले फिल्म धान्छ र रु भन्नेले आज के पो भन्दै होलान् । आज म खुसी छु हामी खुसी छौ र तैँले थाहा नपाउने गरि ती हजारौँ खुसी छन्, जो कलाकारितामा भविष्य खोजिरहेका छन् ।

तैँले यो पत्र पढ्न लगाउन्जेल चलचित्रले आफ्नै इतिहास भत्काएर आफ्नै नयाँ इतिहास बनाइसक्ने छ । यो यात्रा मा जोडिन पाउनु मेरो सौभाग्य हो तँलाई आगामी दिनको लागि उत्तरोत्तर प्रगतिको कामना र अन्त्यमा छोरोलाई मस्तै पढाएस् र फेरि पनि दुनियाँलाई सुनाइदे गरिबी हेपाइबाट छुटकारा पाउने एउटै विकल्प शिक्षा हो भनेर ।’
तँलाई माया गर्ने बिरे ।

भुसालको स्ट्याटसमा मुख्य कलाकार बरालले आफू स्ट्याटस पढेर सारै भावुक भएको प्रतिक्रिया दिएका छन् । उनले लेखका छन्, ‘म त साह्रै भाबुक भए नि दाजु मुकुन । हिजो डियर महेशले यसै गरि भाबुक बनायो । तपाईँले लेखेर यो पत्र पढिरहँदा म एकदमै सुरुवाती समय र अहिलेको अवस्था सम्झँदै छु । दाजुभाइ गज्जब दोस्ती भइयो । भोलि हामी ३ भाइ भेट्नेछौ । मज्जाले कुरा गर्नेछौ ।’