विमल गुरुङ कृति पुरस्कार थाम्सुहाङको ‘शब्दथुम’लाई, राष्ट्रिय कविता महोत्सवमा अन्जान प्रदीप प्रथम

सुनसरी । कवि विमल गुरुङ कृति पुरस्कार प्रकाश थाम्सुहाङको निबन्ध कृति ‘शब्दथुम’लाई प्रदान गरिएको छ । २०८० भित्र प्रकाशित स्वदेश र विदेशबाट नेपाली भाषाका पुस्तकहरुमध्ये ‘शब्दथुम’लाई ‘कवि विमल गुरुङ कृति पुरस्कार–२०८०’ प्रदान गरिएको हो ।

कवि विमल गुरुङको ५३ औं जन्मजयन्ती तथा ३३ औ राष्ट्रिय कविता महोत्सवको अवसरमा शनिबार पुस्तकालयको भवनमा आयोजित पुरस्कार समर्पण समारोहमा नेपाल संस्कृत विश्वविद्यालयका निमित्त उपकुलपति प्राडा भीम खतिवडा, अध्यक्ष पूर्णवहादुर गुरुङले कृतिकार थाम्सुहाङलाई तामत्रपत्र र दोसल्लासहित नगद दुई लाख रुपैयाँले सम्मान गरे। यसअघि थाम्सुहाङको ‘पालामको मुर्छन्ना’ कवितासंग्रह प्रकाशित भएको थियो । ‘शब्दथुम’ उनको दोश्रो कृति हो ।

निर्णायक समितिले ‘शब्दथुम’ले शब्दको शक्तिलाई पुष्टि गर्ने प्रयत्न गरेको र कृतिभित्र रैथाने चेतदेखि बैश्विक चिन्तन र मिमांसा पाएको दावी गर्दै विमल कृति पुरस्कार प्रदान गरिएको जनाएको छ । पुरस्कृत भएपछि थाम्सुहाङले भने, ‘मैले पुर्वेली रैथाने चेत, संस्कृति र जीवनशैलीलाई आवाज दिने काम निवन्धमार्फत गरेको हो । आफ्नो भूगोलको सांस्कृतिक पक्ष र सिमान्तीकृत चेतलाई उजागर गर्दै आफ्नै धरातलको विचार प्रवाह गर्दै मातृभूमिको सुगन्ध र सांस्कृतिक रोमाञ्चचकतामा शालिन विमर्ष गर्ने प्रयास गरेको छु ।’

यसैगरी उक्त अवसरमा इटहरीका तरहराका युवा साहित्यकार तथा संचारकर्मी विवेक विवस रेग्मीलाई कवि विमल गुरुङ स्मृति पुस्तकालय युवा सम्मान प्रदान गरिएको छ । सम्मानसहित उनलाई नगद राशी १० हजार रुपैयाँ, दोस्लला र सम्मान पत्र प्रदान गरिएको थियो । उक्त अवसरमा सिक्किमका लेखक टी वी चन्द्र सुब्बा, १०३ वर्षीया ज्येष्ठ नागरिक दिलमाया गुरुङ र विरेन गुरुङलाई पनि सम्मान गरिएको थियो ।

यही अवसरमा आयोजना भएको राष्ट्रिय कविता प्रतियोगितामा अवलपरासीका अन्जान प्रदीप प्रथम भए । उनको ‘सपना’ शीर्षकको कविताले प्रथम स्थान हासिल गरेको हो । यसैगरी ंथेम्स नदीको किनारै किनार’ शीर्षको शान्ति खिम्दिङ लिम्बुको कविता दोस्रो भयो भने समीक्षा छिलिङ राईको कविता ‘फूल र म’ले तृतीय स्थान हासिल गरेको थियो । पतियोगितामा विजयी कविहरुलाई क्रमशः २१ हजार, १८ हजार र १७ हजार रुपैयाँ नदग र प्रमाणपत्र प्रदान गरिएको थियो ।

समारोहमा कवि विमल गुरुङकाबारेमा साहित्यकार शशी लुमुम्बुले प्रकास पारेका थिए । १९ बर्षको उमेरमै पत्रकारितासंगै शसक्त कविता लेखेर उदाउँदै गरेको बेला २०४८ साल बैशाख २४ गते धादिङको जुकेपानीमा बस दुर्घट्नामा परी विमलको देहावसान भएपछि एक्लो कवि छोराको नाममा बेलायती लाहुरे बाबु पूर्णवहादुर गुरुङ र परिवारले धरान १८ बुद्धचोकमा ‘कवि विमल स्मृति पुस्तकालय’ स्थापना गरेको लुमुम्बुले बताए ।