‘पूर्णबहादुरको सारङ्गी’को निर्माण पक्षले वास्ता नगरेको भन्दै उपन्यासकार बस्यालले दिए कानूनी उपचार खोज्ने चेतावनी

रुपन्देही । अहिले आमदर्शकको मन जितिरहेको नेपाली चलचित्र ‘पूर्णबहादुरको सारङ्गी’ले आफ्नो उपन्यासको कथा चोरेको आरोप लगाएर चर्चामा आएका छन् डा. शिवशंकर बस्याल । आफूले लेखेको ‘संग्रामपुर’ उपन्यासका थुप्रै प्रसंगहरु ‘पूर्णबहादुरको सारङ्गी’मा कपी गरिएको उनको दाबी छ ।

लेखक बस्यालले नेपाल प्रेससँग कुरा गर्दै चलचित्रमा देखाइएका पात्र, कथावस्तु र परिवेश अधिकांश मूल कथासँग मिल्नु स्वाभाविक हुन नसक्ने बताए । आफूले सन् २०२० मा प्रकाशित गरेको उपन्यासको आधारमा चलचित्र बनाइए पनि कुनै स्रोतसमेत नखुलाइएको र निर्मातालाई जानकारी दिँदासमेत वेवास्ता गरेको उनको गुनासो छ ।

बस्यालले भने, ‘मैले कुनै नेपाली चलचित्रको विरोध गरेको होइन, तर मेरो उपन्यासलाई आधार बनाएर चलचित्र बनाउने अनि मैले प्रमाणसहित जानकारी दिँदा पनि कुनै प्रतिक्रियासमेत नदिने गर्दा मेरो मन दुःखेको छ ।’

अब म काठमाडौं पुगेर पत्रकार सम्मेलन गरेर यो विषयलाई प्रष्ट पार्ने बस्यालले बताए ।

‘मेरो मेहनतको चोरी हुँदा उल्टै मलाई नै आरोप लगाएर बोल्नेहरुलाई मैले जवाफ दिनुपर्ने भयो, कानूनी उपचारमा जान्छु’, उनले भने, ‘मुद्दा मामिला गरेर नेपाली दर्शकको मन जितेको चलचित्र रोक्ने पक्षमा म थिइनँ, तर जानकारी गराउँदा पनि निर्माण पक्षबाट छलफलको वातावरण नबनाइएकाले चित्त दुःखेको हो ।’

पश्चिम नवलपरासीको सुनवल नगरपालिका वडा नं १२ भूमही बस्ने बस्यालले ३ वर्षको मेहनत गरेर सन् २०२० मा यो उपन्यास प्रकाशित गरेको बताए ।

‘चलचित्रले राम्रो प्रदर्शन गरिरहँदा मेरा कुराहरु तीतो लाग्नसक्छ, तर सबै प्रमाणसहित मैले यो बोलिरहेको छु । अदालतले त न्याय दिन्छ भन्ने आशा छ’, उनले भने ।

‘म निर्माण पक्षसँग कुरा गर्ने कोसिस गरिरहेको छु । केही यसै क्षेत्रका साथीहरुले पनि लबिङ गर्नुभएको छ । मैले कुनै रकम माग गरेर, यसलाई असफल बनाउँ भनेर, कसैले उचालेर यो गरेको छैन । सहज रुपमा निर्माण पक्ष नआएपछि कानूनी उपचारको विकल्प खोजेको हुँ’, उनले भने ।