हरिबोधिनी एकादशी : पशुपतिनाथ तोरणले सिंगारियो (तस्बिरहरु)

काठमाडौं । आज हरिबोधिनी एकादशी । यही अवसरमा पशुपतिनाथ क्षेत्र तोरणले सजाइएको छ । भक्तजनले बागमती नदी र पशुपति मन्दिर क्षेत्रलाई केन्द्रित गरेर तोरण टाँगेर पशुपति क्षेत्रलाई सजाएका हुन् ।

आषाढ शुक्ल एकादशीदेखि कार्तिक शुक्ल पूर्णिमासम्म सनातन धर्मावलम्बीले घरघरमा तुलसी रोपी विशेष पूजा आराधना गर्छन्।

ठूलो एकादशी, विशेष गरी हरिबोधिनी एकादशीका अवसरमा नदी वारपार तोरण टाँग्नुको धार्मिक महत्वलाई गहिरो अर्थमा लिइन्छ।

परम्परागत रूपमा, हरिबोधिनी एकादशीलाई भगवान् विष्णुको निन्द्राबाट जागृत हुने दिन मानिन्छ।

यो दिन भगवानको पूजा–आराधना गरी व्रत बस्नु र यस्ता प्रतीकात्मक क्रियाकलापमा सहभागी हुनुले धार्मिक तथा सांस्कृतिक पक्षलाई सम्मान गर्ने विश्वासलाई प्रतिबिम्बित गर्छ।

तोरण लगाउनुको अर्थ भगवानको शक्तिमा आश्रित भई सम्पूर्ण दुःख–कष्टबाट मुक्ति प्राप्त गर्नु र पापको नाश गर्दै पुण्य अर्जन गर्नु हो।

तोरणलाई स्वर्गको प्रतीक मानिन्छ, र यसलाई सजाएर नदी वारपार टाँग्दा आत्मिक शुद्धता प्राप्त गर्न सकिने विश्वास रहिआएको छ।