भैरहवामा रास्वपा कार्यकर्ता राष्ट्रिय झण्डा बोकेर प्रदर्शनमा, रविमाथि राजनीतिक प्रतिशोध भन्दै सरकारको विरोध (भिडिओ)

रुपन्देही । राष्ट्रिय स्वतन्त्र पार्टी (रास्वपा) नेता-कार्यकर्ताले रुपन्देहीको भैरहवामा प्रदर्शन गर्दै राजनीतिक प्रतिशोधका आधारमा पार्टी सभापति रवि लामिछानेलाई पक्राउ गरिएको भन्दै विरोध गरेका छन् ।

प्रदर्शनकारीले रास्वपाको झण्डा नबोकि राष्ट्रिय झण्डासहित प्रदर्शन गरेपनि लामिछानेमाथि अन्याय भएको भन्दै सरकारको विरोधमा लगातार नारावाजी गरिरहेका छन् ।

बिहानैदेखि विमानस्थल अघि जम्मा भएर प्रदर्शनमा उत्रिएका उनीहरुले अहिले भैरहवास्थित जिल्ला सरकारी वकिल कार्यालयको उत्तरपट्टीको भित्री सडक र बजारमा प्रदर्शन गरिरहेका छन् ।

सहकारीको रकम ठगी, संगठित अपराध र सम्पत्ति शुद्धिकरण सम्बन्धि कसुरमा अनुसन्धान रहेको सभापति लामिछानेको समर्थनमा पार्टीको तर्फबाट प्रदर्शन गरेको भन्दै आलोचना भएपछि भैरहवामा भने पार्टीको झण्डा प्रयोग भएको छैन तर आन्दोलनको नेतृत्व पार्टीकै नेताहरुले गरिरहेका छन् ।

मंगलबार रास्वपाका सभापति, पूर्व गृहमन्त्री एवं गोर्खा मिडिया नेटवर्कका पूर्व प्रवन्ध निर्देशक लामिछानेलाई भैरहवा ल्याउने सूचना पाएपछि बिहानैबाट जम्मा भएका उनका समर्थकले दिनभरजसो प्रदर्शन गरिरहेका छन् । रास्वपा कार्यकर्ताको मोटरसाइकल र्याली बुद्ध चोकबाट सुरु भएर विमानस्थल, गल्लामण्डी हुँदैं पुनः बुद्ध चोक पुगेको थियो ।

कार्यकर्ताले प्रदर्शन शान्तिपूर्ण हुने उल्लेख गर्दै प्रदर्शनकर्ताका लागि आचारसंहिता सार्वजनिक गरेका थिए । उनीहरुले सहकारी पीडितलाई न्याय दे, राजनीतिक प्रतिशोध नसाँध, रविलाई न्याय दे लगायतका नारा लगाइरहेका छन् ।

रास्वपा कार्यकर्ताले भैरहवाको बुद्धचोकमा भेला भएर सभापतिको रिहाई माग गर्नुका साथै पक्राउको विरोध गरेपछि नाराबाजीसहित विरोध गर्दै सरकारी वकिल कार्यालय नजिक पुगेका छन् ।

यो आन्दोलनको अगुवाई प्रदेश समितिले गरेपनि रुपन्देही आसपासका मात्रै कार्यकर्ता जम्मा भएको प्रदेश अध्यक्ष देवराज पाठकले बताए । लामिछानेलाई पोखराबाट बुद्ध एयरको जहाजबाट मध्यान्ह भैरहवा ल्याइएपछि सिधै सरकारी वकिलको कार्यालयमा बयानका लागि पुराइएको थियो ।