भैरहवामा आज पनि रास्वपाका कार्यकर्ताको प्रदर्शन (भिडिओ)

रुपन्देही । राष्ट्रिय स्वतन्त्र पार्टी (रास्वपा)का सभापति तथा पूर्वगृहमन्त्री रवि लामिछाने पक्राउको विरोधमा रुपन्देहीको भैरहवामा मंगलबारभन्दा आज बुधबार सो पार्टीका समर्थकहरु बढी देखिए ।

मंगलबार पनि दिनभरजसो प्रदर्शन गरेका रास्वपा कार्यकर्ताहरुले बुधबार शक्ति बढाएका हुन् । मंगलबार मध्यान्ह साढे १२ बजेदेखि साँझ ६ बजेसम्म उनको बयान जिल्ला सरकारी वकिल कार्यालयमा लिइरहेपनि आसपासका क्षेत्रमा नियमितजसो प्रदर्शन गरिरहेका थिए । आज सबा १० बजे बयानका लागि पुराइएपछि ११ बजेबाट प्रदर्शन थालिएको हो ।

लुम्बिनी रोडमा रास्वपा नेता कार्यकर्ताले लामिछानेको पक्षमा प्रदर्शनपछि कोणसभा गरिएको छ । रास्वपा लुम्बिनी प्रदेश सभापति देवराज पाठकले मंगलबार आकस्मिक भएर समर्थकहरु थोरै भएपनि आज हिजोभन्दा बढेका हुन् ।

बुधबार प्रदर्शनपछि आयोजित सभामा रास्वपाका केन्द्रीय उपसभापति डिपी अर्यालले सबैतिरको बयानमा सहकारीको रकम अपचलन अस्वीकार गरेको अवस्थामा पनि एकै विषय धेरै जिल्लामा तानेर समय लम्बाउनु राजनीतिक प्रतिशोध बाहेक केही नभएको बताए ।

उनले विभिन्न जिल्लामा डुलाएर कानुनी छिद्र खोजेर अलमलाउन खोजिए पनि त्यो संभव नभएको बताए । रुपन्देहीमा जम्मा भएका पार्टीका समर्थकहरुलाई उनले आन्दोलनलाई मर्यादित बनाउन आग्रह गरे ।

विरोध सभालाई रास्वपाका लुम्बिनी प्रदेश अध्यक्ष देवराज पाठक, केस विजय जैरु, केन्द्रीय संगठन विभाग सचिव शंकरप्रसाद श्रेष्ठ, रुपन्देही सभापति बुद्धि शर्मा, नेता गणेश पौडेललगायतले सरकारले गलत नियतले पार्टी सभापतिलाई दुःख दिइरहेको बताएका थिए ।

बुटवलको सुप्रिम सहकारीमा बचत ठगी गरेको आरोपमा लामिछानेलाई हिजो कास्कीबाट रुपन्देही ल्याएको थियो। अहिले सरकारी वकिलको कार्यालयमा उनको बयान चलिरहेको छ।

बुटवलस्थित सुप्रिम बचत तथा ऋण सहकारी संस्थाको १४ करोड २९ लाख रुपैयाँ गोरखा मिडिया नेटवर्क प्रालिमा लगेर खर्च गरेको भन्दै लामिछानेविरुद्ध सङ्गठित ठगी गरेको आरोपमा अनुसन्धान भइरहेको छ । बयानमा भने उनले सहकारीबाट रकम नलगेको दावी गरिरहेका छन् ।

प्रहरीले बुधबार नै बयान सकेर पठाउने तयारी गरेपनि अझै केही टुंगो लागेको छैन ।