नेपाल बैंक ८८औं वर्षमा प्रवेश, २५ लाखभन्दा बढी ग्राहकलाई वित्तीय सेवा

काठमाडौं । नेपालको पहिलो बैंक नेपाल बैंक लिमिटेडले आफ्नो ८८औं वार्षिकोत्सव समारोह भव्यताका साथ सम्पन्न गरेको छ । वि.सं.१९९४ साल कार्तिक ३० गते स्थापना भएको बैंक २०८१ साल कार्तिक ३० गते आफ्नो ८७औं वर्ष पूरा गरी ८८औं वर्षमा प्रवेश गरेको छ ।

यसै अवसरमा प्रधान कार्यालयको प्राङ्गणमा आयोजित वार्षिकोत्सव समारोह नेपाल राष्ट्र बैंकका गभर्नर महाप्रसाद अधिकारीको प्रमुख आतिथ्यमा ८८औं वार्षिकोत्सव समारोह सम्पन्न भएको हो ।

उक्त समारोहको अध्यक्षता बैंकका सञ्चालक समिति अध्यक्ष डा. चन्द्रबहादुर अधिकारीले गरेका थिए ।

नेपाल बैंकले देशभर २२९ शाखा, २०५ एटीएम मेसिनका साथै ६० वटा एक्टेन्सन काउन्टरमार्फत करिब २५ लाखभन्दा बढी ग्राहकलाई वित्तीय सेवा पुर्‍याइरहेको छ । बैंकले हाल ग्राहक सेवामा व्यापक सुधार गरी आधुनिक बैंकिङ प्रविधिमार्फत बैकिङ सेवा सुविधा प्रदान गर्दै प्रतिस्पर्धी  रुपमा अगाडि बढिरहेको छ ।

करिब ९ लाखभन्दा बढी ग्राहकले डिजिटल प्रविधिमार्फत बैंकिङ सेवा लिई लाभान्वित भएका छन् । विगत केही वर्षयता छिटोछरितो र गुणस्तरीय ग्राहक सेवामा मुख्य जोड दिई युवा जनशक्तिमार्फत नेपालभर  बैंकिङ सेवा प्रदान गरिरहेको बैंकले जनाएको छ ।