सर्केगाडमा रास्वपाकी उपाध्यक्ष उम्मेदवार पछि हटिन्, डर–धम्की दिइएको पार्टीको दावी

काठमाडौं । राष्ट्रिय स्वतन्त्र पार्टी (रास्वपा) बाट हुम्लाको सर्केगाड गाउँपालिका उपाध्यक्षमा उम्मेदवार बन्ने तयारी गरेकी सुजाता थापा निर्णयबाट ब्याक भएकी छन् । रास्वपाले उनलाई डर धम्की दिएर उम्मेदवारीबाट पछि हट्न बाध्य बनाइएको बताएको छ ।

हिजो रास्वपा महामन्त्री कविन्द्र बुर्लाकोटीले फेसबुकमा एक पोस्ट गर्दै सुजाता र उनको श्रीमान बल थापालाई ४०–५० जना युवाहरुको समूहले घरबाट लछारपछार गर्दै लगिएको दावी गरेका थिए । सुजाताको ससुरा सर्केगाड ४ को कांग्रेस सभापति रहेको र उनकै ईशारामा यसरी अपहरण गरिएको बुर्लाकोटीले आशंका गरेका छन् ।

यस विषयमा हुम्लाका प्रमुख जिल्ला अधिकारी नारायण पाण्डेसँग बुझ्दा सुजाताको अपहरण नभएको बताए ।

उनले भने, ‘हामीलाई पनि अपहरण भएको भन्ने सूचना आएको थियो । मैले सुरक्षा संयन्त्रमार्फत बुझ्न लगाएँ । सुरक्षा संयन्त्रले उहाँसित कुरा गर्दा आफू सकुशल रहेको र कुनै सुरक्षा खतरा नरहेको बताउनु भएको छ । आफ्नो राजनीतिक पृष्ठभूमि फरक रहेकाले रास्वपाबाट उम्मेदवारी दिने मनशाय नरहेको उहाँको भनाइ सुरक्षा संयन्त्रमार्फत मलाई आएको छ ।’

रास्वपाले भने सुजातालाई डरत्राशमा राखेर बोल्न लगाइएको भन्दै सुरक्षाको प्रत्याभूति गर्न माग गरेको छ । रास्वपाका केन्द्रीय निर्वाचन परिचालन संयोजन समितिका संयोजक गणेश पराजुलीले थापाले आफू उपाध्यक्ष नउठ्ने जानकारी पार्टीलाई गराएको बताए ।

‘उहाँ अपहरणमुक्त हुनुभएको सूचना आएको छ । उहाँले हाम्रा साथीहरुसँग अब चुनाव उठ्दिन भन्नुभएको छ । डर धम्कीकै कारण उहाँ उम्मेदवारीबाट पछि हट्न वाध्य हुनुभएको हो,’ पराजुलीले भने ।

उपनिर्वाचन हुने अन्य क्षेत्रमा पनि रास्वपाका सम्भावित उम्मेदवारहरुलाई डर धम्की दिने काम भइरहेको उनले बताए । यस विषयमा सुरक्षा निकायहरुलाई जानकारी गराउँदा पनि चित्तबुझ्दो पहल नभएको उनको गुनासो छ ।