‘ह्रस्व दीर्घ’ को सुखद ओपनिङका बीच हरिहर भन्छन्- हामीलाई असफल पार्न गिरोह नै लागेको छ

काठमाडौं । शुक्रबारबाट प्रदर्शनमा आएको चलचित्र ‘हृश्व दीर्घ’ ले सुखद ओपनिङ गरेको शुक्रबार र शनिबार उल्लेख्य संख्यामा दर्शक हलमा ओइरिए, तथापि फिल्मलाई पर्याप्त शो प्राप्त भएको छैन ।

‘पूर्णबहादुरको सारंगी’ ले हलहरुमा रजगज गरिरहेको चुनौतिपूर्ण समयमा ह्रस्व दीर्घ रिलिज भएको थियो । ६ करोडमा निर्माण भएको यो चलचित्रले लगानी उठाउन बक्स अफिसमा लामो यात्रा गर्नुपर्ने छ । पहिलो दुई दिनले राम्रो लक्षण देखाए तापनि यो साताभरिको व्यापारले चलचित्रको भविष्य निर्धारण गर्छ ।

ह्रस्वदिर्घका निर्माता तथा अभिनेता हरिहर अधिकारीले चलचित्रले दर्शकहरुको बलियो साथ पाएको बताए । तर, केही व्यक्तिहरु आफ्नो चलचित्रलाई असफल बनाउन लागेको उनको गुनासो छ ।

उनले नेपालप्रेसलाई भने, ‘दर्शकको यति राम्रो साथ दिइरहेका बेला असफल बनाउन गिरोह नै सक्रिय बनेको छ । मुख छाड्ने, जे मन लाग्यो त्यही भन्दिने गरिरहेका छन् । हामी अति नै गाह्रो अवस्थामा छौं । किन यस्तो भयो, कसरी यस्तो भयो अचम्म लागेको छ ।’

यद्यपि, आफूले कसैलाई दोषारोपण नगर्ने अधिकारीले बताए ।

उनले थप भने, ‘यसले गर्यो होला भन्ने शंका चाहीँ लागेको छ । तर, बोल्न सक्ने अवस्था छैन । प्रमाणाबिनै अरोप लगाउनु पनि भएन ।’

दर्शकको चाप बढेपछि हलहरुले हिजो शनिबार केही शो थपिदिएको भए हुन्थ्यो भन्ने अधिकारीले महसुस गरेका छन् ।

‘दर्शकहरु टिकट नपाएर घर फर्किरहेको वेला, हिन्दी फिल्ममा दर्शक नआइरहेको बेला ‘ह्रश्व दीर्घ’ लाई एक–दुई शो मात्रै बढाइदिएको भए हुन्थ्यो भन्ने लागेको हो,’ उनले भने ।

आजबाट भने १२÷१५ शो बढाइदिएको अधिकारीले बताए ।

यसैबीच, ह्रस्व दिर्घको प्रचारका लागि गजनी फेम्ड प्रदीप रावत श्रीमतीसहित नेपाल आउँदै छन् । उनले भोलिबाट हल–हलमा गएर दर्शक भेट्ने योजना छ । समय मिलेमा उपत्यका बाहिरका हलहरुमा पनि रावत पुग्नेछन् ।

रावतले एक भिडियो सन्देश पनि जारी गरेका छन् । उक्त भिडियो सन्देशमा उनले भनेका छन्, ‘भगवान पशुपतिनाथको कृपाले हाम्रो चलचित्रले सफलताको सिँढी चढिरहेको छ । तपाईहरुले माया र आशीर्वाद दिइरहनुभएको छ । यसले हाम्रो उत्साह दुई गुणा बढाएको छ ।’