अयोध्यामा श्रीराम तिलकोत्सव: माता सीताको अभिभावकको भूमिकामा मधेशका मुख्यमन्त्री सहभागी (फोटो फिचर)

जनकपुरधाम । सीता-राम विवाह पञ्चमीअन्तर्गत आज पहिलो पटक भारतको अयोध्यामा भगवान श्रीरामको तिलकोत्सव हुँदैछ ।

तिलकोत्सवका लागि मधेशका मुख्यमन्त्री सतिश सिंह, मन्त्रीहरु, जानकी मन्दिरका छोटा महन्त रामरोषण दास र विश्व हिन्दू परिषद्को टोली अयोध्या पुगेको छ । टोलीको नेतृत्व मुख्यमन्त्री सिंहले गरेका छन् ।

रामसेवकपुरम् अयोध्यामा अहिले श्री राम तिलकोत्सव समारोह जारी छ । माता सीताको अभिभावकको भूमिकामा मुख्यमन्त्री सिंह र छोटा महन्त दास पूजामा बसेका छन् ।

श्रीराम मन्दिर ट्रष्टका सचिव चम्पत राय भगवान श्रीरामको अभिभावकको भूमिकामा छन् । दुवैतर्फका प्रतिनिधिलाई राखेर पण्डितले मन्त्रोचारण गरी तिलकोत्सव गराइरहेका छन् । सो समारोहमा ठूलो संख्यामा साधुसन्त सहभागी छन् । अहिले गीतनाद चलिरहेको छ ।

विवाह अगाडि बेहुलीको आफन्त बेहुलाको घर पुगेर तिलकोत्सव गरिने चलन छ । त्रेतायुगमा भगवान श्रीराम र माता सीताबीच विवाह भएको थियो । त्यसकै सम्झनामा जनकपुरधाममा हरेक वर्ष विवाह पञ्चमी विशेष धुमधामका साथ मनाइन्छ ।

भारतको उत्तर प्रदेशमा पर्ने अयोध्या भगवान रामको जन्मभूमि हो । त्यहाँबाट हरेक पाँचरपाँच वर्षमा जनकपुरधाम जन्ती आउने गरेको छ । यसवर्ष पनि अयोध्याबाट जन्ती आउने बताइएको छ ।

विवाह पञ्चमी मंसिर २१ गते परेको छ । अयोध्याबाट जन्ती मंसिर १८ गते आइपुग्नेछ । जन्ती चार दिन जनकपुरधाममा बसेर मंसिर २२ गते अयोध्या फर्किनेछ ।